Gen 33:1 א וישא יעקב עיניו וירא והנה עשו בא ועמו ארבע מאות איש ויחץ את הילדים על לאה ועל רחל ועל שתי השפחות
Gen 33:2 ב וישם את השפחות ואת ילדיהן ראשנה ואת לאה וילדיה אחרנים ואת רחל ואת יוסף אחרנים
Gen 33:3 ג והוא עבר לפניהם וישתחו ארצה שבע פעמים עד גשתו עד אחיו
Gen 33:4 ד וירץ עשו לקראתו ויחבקהו ויפל על צוארו וישקהו ויבכו
Gen 33:5 ה וישא את עיניו וירא את הנשים ואת הילדים ויאמר מי אלה לך ויאמר--הילדים אשר חנן אלהים את עבדך
Gen 33:6 ו ותגשן השפחות הנה וילדיהן ותשתחוין
Gen 33:7 ז ותגש גם לאה וילדיה וישתחוו ואחר נגש יוסף ורחל--וישתחוו
Gen 33:8 ח ויאמר מי לך כל המחנה הזה אשר פגשתי ויאמר למצא חן בעיני אדני
Gen 33:9 ט ויאמר עשו יש לי רב אחי יהי לך אשר לך
Gen 33:10 י ויאמר יעקב אל נא אם נא מצאתי חן בעיניך ולקחת מנחתי מידי  כי על כן ראיתי פניך כראת פני אלהים--ותרצני
Gen 33:11 יא קח נא את ברכתי אשר הבאת לך כי חנני אלהים וכי יש לי כל ויפצר בו ויקח
Gen 33:12 יב ויאמר נסעה ונלכה ואלכה לנגדך
Gen 33:13 יג ויאמר אליו אדני ידע כי הילדים רכים והצאן והבקר עלות עלי ודפקום יום אחד ומתו כל הצאן
Gen 33:14 יד יעבר נא אדני לפני עבדו ואני אתנהלה לאטי לרגל המלאכה אשר לפני ולרגל הילדים עד אשר אבא אל אדני שעירה
Gen 33:15 טו ויאמר עשו--אציגה נא עמך מן העם אשר אתי ויאמר למה זה אמצא חן בעיני אדני
Gen 33:16 טז וישב ביום ההוא עשו לדרכו שעירה
Gen 33:17 יז ויעקב נסע סכתה ויבן לו בית ולמקנהו עשה סכת על כן קרא שם המקום סכות  {ס}
Gen 33:18 יח ויבא יעקב שלם עיר שכם אשר בארץ כנען בבאו מפדן ארם ויחן את פני העיר
Gen 33:19 יט ויקן את חלקת השדה אשר נטה שם אהלו מיד בני חמור אבי שכם--במאה קשיטה
Gen 33:20 כ ויצב שם מזבח ויקרא לו--אל אלהי ישראל  {ס}