Gen 27:1 א ויהי כי זקן יצחק ותכהין עיניו מראת ויקרא את עשו בנו הגדל ויאמר אליו בני ויאמר אליו הנני
Gen 27:2 ב ויאמר הנה נא זקנתי לא ידעתי יום מותי
Gen 27:3 ג ועתה שא נא כליך תליך וקשתך וצא השדה וצודה לי צידה (ציד)
Gen 27:4 ד ועשה לי מטעמים כאשר אהבתי והביאה לי--ואכלה  בעבור תברכך נפשי בטרם אמות
Gen 27:5 ה ורבקה שמעת--בדבר יצחק אל עשו בנו וילך עשו השדה לצוד ציד להביא
Gen 27:6 ו ורבקה אמרה אל יעקב בנה לאמר  הנה שמעתי את אביך מדבר אל עשו אחיך לאמר
Gen 27:7 ז הביאה לי ציד ועשה לי מטעמים ואכלה ואברככה לפני יהוה לפני מותי
Gen 27:8 ח ועתה בני שמע בקלי--לאשר אני מצוה אתך
Gen 27:9 ט לך נא אל הצאן וקח לי משם שני גדיי עזים טבים ואעשה אתם מטעמים לאביך כאשר אהב
Gen 27:10 י והבאת לאביך ואכל בעבר אשר יברכך לפני מותו
Gen 27:11 יא ויאמר יעקב אל רבקה אמו  הן עשו אחי איש שער ואנכי איש חלק
Gen 27:12 יב אולי ימשני אבי והייתי בעיניו כמתעתע והבאתי עלי קללה ולא ברכה
Gen 27:13 יג ותאמר לו אמו עלי קללתך בני אך שמע בקלי ולך קח לי
Gen 27:14 יד וילך ויקח ויבא לאמו ותעש אמו מטעמים כאשר אהב אביו
Gen 27:15 טו ותקח רבקה את בגדי עשו בנה הגדל החמדת אשר אתה בבית ותלבש את יעקב בנה הקטן
Gen 27:16 טז ואת ערת גדיי העזים הלבישה על ידיו--ועל חלקת צואריו
Gen 27:17 יז ותתן את המטעמים ואת הלחם אשר עשתה ביד יעקב בנה
Gen 27:18 יח ויבא אל אביו ויאמר אבי ויאמר הנני מי אתה בני
Gen 27:19 יט ויאמר יעקב אל אביו אנכי עשו בכרך--עשיתי כאשר דברת אלי קום נא שבה ואכלה מצידי--בעבור תברכני נפשך
Gen 27:20 כ ויאמר יצחק אל בנו מה זה מהרת למצא בני ויאמר כי הקרה יהוה אלהיך לפני
Gen 27:21 כא ויאמר יצחק אל יעקב גשה נא ואמשך בני  האתה זה בני עשו אם לא
Gen 27:22 כב ויגש יעקב אל יצחק אביו וימשהו ויאמר הקל קול יעקב והידים ידי עשו
Gen 27:23 כג ולא הכירו--כי היו ידיו כידי עשו אחיו שערת ויברכהו
Gen 27:24 כד ויאמר אתה זה בני עשו ויאמר אני
Gen 27:25 כה ויאמר הגשה לי ואכלה מציד בני--למען תברכך נפשי ויגש לו ויאכל ויבא לו יין וישת
Gen 27:26 כו ויאמר אליו יצחק אביו  גשה נא ושקה לי בני
Gen 27:27 כז ויגש וישק לו וירח את ריח בגדיו ויברכהו ויאמר ראה ריח בני כריח שדה אשר ברכו יהוה
Gen 27:28 כח ויתן לך האלהים מטל השמים ומשמני הארץ--ורב דגן ותירש
Gen 27:29 כט יעבדוך עמים וישתחו (וישתחוו) לך לאמים--הוה גביר לאחיך וישתחוו לך בני אמך ארריך ארור ומברכיך ברוך
Gen 27:30 ל ויהי כאשר כלה יצחק לברך את יעקב ויהי אך יצא יצא יעקב מאת פני יצחק אביו ועשו אחיו בא מצידו
Gen 27:31 לא ויעש גם הוא מטעמים ויבא לאביו ויאמר לאביו יקם אבי ויאכל מציד בנו--בעבר תברכני נפשך
Gen 27:32 לב ויאמר לו יצחק אביו מי אתה ויאמר אני בנך בכרך עשו
Gen 27:33 לג ויחרד יצחק חרדה גדלה עד מאד ויאמר מי אפוא הוא הצד ציד ויבא לי ואכל מכל בטרם תבוא ואברכהו גם ברוך יהיה
Gen 27:34 לד כשמע עשו את דברי אביו ויצעק צעקה גדלה ומרה עד מאד ויאמר לאביו ברכני גם אני אבי
Gen 27:35 לה ויאמר בא אחיך במרמה ויקח ברכתך
Gen 27:36 לו ויאמר הכי קרא שמו יעקב ויעקבני זה פעמים--את בכרתי לקח והנה עתה לקח ברכתי ויאמר הלא אצלת לי ברכה
Gen 27:37 לז ויען יצחק ויאמר לעשו הן גביר שמתיו לך ואת כל אחיו נתתי לו לעבדים ודגן ותירש סמכתיו ולכה אפוא מה אעשה בני
Gen 27:38 לח ויאמר עשו אל אביו הברכה אחת הוא לך אבי--ברכני גם אני אבי וישא עשו קלו ויבך
Gen 27:39 לט ויען יצחק אביו ויאמר אליו  הנה משמני הארץ יהיה מושבך ומטל השמים מעל
Gen 27:40 מ ועל חרבך תחיה ואת אחיך תעבד והיה כאשר תריד ופרקת עלו מעל צוארך
Gen 27:41 מא וישטם עשו את יעקב על הברכה אשר ברכו אביו ויאמר עשו בלבו יקרבו ימי אבל אבי ואהרגה את יעקב אחי
Gen 27:42 מב ויגד לרבקה את דברי עשו בנה הגדל ותשלח ותקרא ליעקב בנה הקטן ותאמר אליו הנה עשו אחיך מתנחם לך להרגך
Gen 27:43 מג ועתה בני שמע בקלי וקום ברח לך אל לבן אחי חרנה
Gen 27:44 מד וישבת עמו ימים אחדים--עד אשר תשוב חמת אחיך
Gen 27:45 מה עד שוב אף אחיך ממך ושכח את אשר עשית לו ושלחתי ולקחתיך משם למה אשכל גם שניכם יום אחד
Gen 27:46 מו ותאמר רבקה אל יצחק קצתי בחיי מפני בנות חת אם לקח יעקב אשה מבנות חת כאלה מבנות הארץ--למה לי חיים