Gen 7:1 א ויאמר יהוה לנח בא אתה וכל ביתך אל התבה  כי אתך ראיתי צדיק לפני בדור הזה
Gen 7:2 ב מכל הבהמה הטהורה תקח לך שבעה שבעה--איש ואשתו ומן הבהמה אשר לא טהרה הוא שנים--איש ואשתו
Gen 7:3 ג גם מעוף השמים שבעה שבעה זכר ונקבה לחיות זרע על פני כל הארץ
Gen 7:4 ד כי לימים עוד שבעה אנכי ממטיר על הארץ ארבעים יום וארבעים לילה ומחיתי את כל היקום אשר עשיתי מעל פני האדמה
Gen 7:5 ה ויעש נח ככל אשר צוהו יהוה
Gen 7:6 ו ונח בן שש מאות שנה והמבול היה מים על הארץ
Gen 7:7 ז ויבא נח ובניו ואשתו ונשי בניו אתו--אל התבה  מפני מי המבול
Gen 7:8 ח מן הבהמה הטהורה ומן הבהמה אשר איננה טהרה ומן העוף--וכל אשר רמש על האדמה
Gen 7:9 ט שנים שנים באו אל נח אל התבה--זכר ונקבה  כאשר צוה אלהים את נח
Gen 7:10 י ויהי לשבעת הימים ומי המבול היו על הארץ
Gen 7:11 יא בשנת שש מאות שנה לחיי נח בחדש השני בשבעה עשר יום לחדש--ביום הזה נבקעו כל מעינת תהום רבה וארבת השמים נפתחו
Gen 7:12 יב ויהי הגשם על הארץ ארבעים יום וארבעים לילה
Gen 7:13 יג בעצם היום הזה בא נח ושם וחם ויפת בני נח ואשת נח ושלשת נשי בניו אתם--אל התבה
Gen 7:14 יד המה וכל החיה למינה וכל הבהמה למינה וכל הרמש הרמש על הארץ למינהו וכל העוף למינהו כל צפור כל כנף
Gen 7:15 טו ויבאו אל נח אל התבה שנים שנים מכל הבשר אשר בו רוח חיים
Gen 7:16 טז והבאים זכר ונקבה מכל בשר באו כאשר צוה אתו אלהים ויסגר יהוה בעדו
Gen 7:17 יז ויהי המבול ארבעים יום על הארץ וירבו המים וישאו את התבה ותרם מעל הארץ
Gen 7:18 יח ויגברו המים וירבו מאד על הארץ ותלך התבה על פני המים
Gen 7:19 יט והמים גברו מאד מאד--על הארץ ויכסו כל ההרים הגבהים אשר תחת כל השמים
Gen 7:20 כ חמש עשרה אמה מלמעלה גברו המים ויכסו ההרים
Gen 7:21 כא ויגוע כל בשר הרמש על הארץ בעוף ובבהמה ובחיה ובכל השרץ השרץ על הארץ--וכל האדם
Gen 7:22 כב כל אשר נשמת רוח חיים באפיו מכל אשר בחרבה--מתו
Gen 7:23 כג וימח את כל היקום אשר על פני האדמה מאדם עד בהמה עד רמש ועד עוף השמים וימחו מן הארץ וישאר אך נח ואשר אתו בתבה
Gen 7:24 כד ויגברו המים על הארץ חמשים ומאת יוםGen 8:1 א ויזכר אלהים את נח ואת כל החיה ואת כל הבהמה אשר אתו בתבה ויעבר אלהים רוח על הארץ וישכו המים
Gen 8:2 ב ויסכרו מעינת תהום וארבת השמים ויכלא הגשם מן השמים
Gen 8:3 ג וישבו המים מעל הארץ הלוך ושוב ויחסרו המים--מקצה חמשים ומאת יום
Gen 8:4 ד ותנח התבה בחדש השביעי בשבעה עשר יום לחדש על הרי אררט
Gen 8:5 ה והמים היו הלוך וחסור עד החדש העשירי בעשירי באחד לחדש נראו ראשי ההרים
Gen 8:6 ו ויהי מקץ ארבעים יום ויפתח נח את חלון התבה אשר עשה
Gen 8:7 ז וישלח את הערב ויצא יצוא ושוב עד יבשת המים מעל הארץ
Gen 8:8 ח וישלח את היונה מאתו--לראות הקלו המים מעל פני האדמה
Gen 8:9 ט ולא מצאה היונה מנוח לכף רגלה ותשב אליו אל התבה--כי מים על פני כל הארץ וישלח ידו ויקחה ויבא אתה אליו אל התבה
Gen 8:10 י ויחל עוד שבעת ימים אחרים ויסף שלח את היונה מן התבה
Gen 8:11 יא ותבא אליו היונה לעת ערב והנה עלה זית טרף בפיה וידע נח כי קלו המים מעל הארץ
Gen 8:12 יב וייחל עוד שבעת ימים אחרים וישלח את היונה ולא יספה שוב אליו עוד
Gen 8:13 יג ויהי באחת ושש מאות שנה בראשון באחד לחדש חרבו המים מעל הארץ ויסר נח את מכסה התבה וירא והנה חרבו פני האדמה
Gen 8:14 יד ובחדש השני בשבעה ועשרים יום לחדש--יבשה הארץ  {ס}
Gen 8:15 טו וידבר אלהים אל נח לאמר
Gen 8:16 טז צא מן התבה--אתה ואשתך ובניך ונשי בניך אתך
Gen 8:17 יז כל החיה אשר אתך מכל בשר בעוף ובבהמה ובכל הרמש הרמש על הארץ--הוצא (היצא) אתך ושרצו בארץ ופרו ורבו על הארץ
Gen 8:18 יח ויצא נח ובניו ואשתו ונשי בניו אתו
Gen 8:19 יט כל החיה כל הרמש וכל העוף כל רומש על הארץ--למשפחתיהם יצאו מן התבה
Gen 8:20 כ ויבן נח מזבח ליהוה ויקח מכל הבהמה הטהרה ומכל העוף הטהור ויעל עלת במזבח
Gen 8:21 כא וירח יהוה את ריח הניחח ויאמר יהוה אל לבו לא אסף לקלל עוד את האדמה בעבור האדם כי יצר לב האדם רע מנעריו ולא אסף עוד להכות את כל חי כאשר עשיתי
Gen 8:22 כב עד כל ימי הארץ  זרע וקציר וקר וחם וקיץ וחרף ויום ולילה--לא ישבתו