Gen 24:1 א ואברהם זקן בא בימים ויהוה ברך את אברהם בכל
Gen 24:2 ב ויאמר אברהם אל עבדו זקן ביתו המשל בכל אשר לו  שים נא ידך תחת ירכי
Gen 24:3 ג ואשביעך--ביהוה אלהי השמים ואלהי הארץ  אשר לא תקח אשה לבני מבנות הכנעני אשר אנכי יושב בקרבו
Gen 24:4 ד כי אל ארצי ואל מולדתי תלך ולקחת אשה לבני ליצחק
Gen 24:5 ה ויאמר אליו העבד אולי לא תאבה האשה ללכת אחרי אל הארץ הזאת ההשב אשיב את בנך אל הארץ אשר יצאת משם
Gen 24:6 ו ויאמר אליו אברהם  השמר לך פן תשיב את בני שמה
Gen 24:7 ז יהוה אלהי השמים אשר לקחני מבית אבי ומארץ מולדתי ואשר דבר לי ואשר נשבע לי לאמר לזרעך אתן את הארץ הזאת--הוא ישלח מלאכו לפניך ולקחת אשה לבני משם
Gen 24:8 ח ואם לא תאבה האשה ללכת אחריך--ונקית משבעתי זאת רק את בני לא תשב שמה
Gen 24:9 ט וישם העבד את ידו תחת ירך אברהם אדניו וישבע לו על הדבר הזה
Gen 24:10 י ויקח העבד עשרה גמלים מגמלי אדניו וילך וכל טוב אדניו בידו ויקם וילך אל ארם נהרים--אל עיר נחור
Gen 24:11 יא ויברך הגמלים מחוץ לעיר אל באר המים לעת ערב לעת צאת השאבת
Gen 24:12 יב ויאמר--יהוה אלהי אדני אברהם הקרה נא לפני היום ועשה חסד עם אדני אברהם
Gen 24:13 יג הנה אנכי נצב על עין המים ובנות אנשי העיר יצאת לשאב מים
Gen 24:14 יד והיה הנער אשר אמר אליה הטי נא כדך ואשתה ואמרה שתה וגם גמליך אשקה--אתה הכחת לעבדך ליצחק ובה אדע כי עשית חסד עם אדני
Gen 24:15 טו ויהי הוא טרם כלה לדבר והנה רבקה יצאת אשר ילדה לבתואל בן מלכה אשת נחור אחי אברהם וכדה על שכמה
Gen 24:16 טז והנער טבת מראה מאד--בתולה ואיש לא ידעה ותרד העינה ותמלא כדה ותעל
Gen 24:17 יז וירץ העבד לקראתה ויאמר הגמיאיני נא מעט מים מכדך
Gen 24:18 יח ותאמר שתה אדני ותמהר ותרד כדה על ידה--ותשקהו
Gen 24:19 יט ותכל להשקתו ותאמר גם לגמליך אשאב עד אם כלו לשתת
Gen 24:20 כ ותמהר ותער כדה אל השקת ותרץ עוד אל הבאר לשאב ותשאב לכל גמליו
Gen 24:21 כא והאיש משתאה לה מחריש--לדעת ההצליח יהוה דרכו אם לא
Gen 24:22 כב ויהי כאשר כלו הגמלים לשתות ויקח האיש נזם זהב בקע משקלו--ושני צמידים על ידיה עשרה זהב משקלם
Gen 24:23 כג ויאמר בת מי את הגידי נא לי היש בית אביך מקום לנו ללין
Gen 24:24 כד ותאמר אליו בת בתואל אנכי--בן מלכה אשר ילדה לנחור
Gen 24:25 כה ותאמר אליו גם תבן גם מספוא רב עמנו--גם מקום ללון
Gen 24:26 כו ויקד האיש וישתחו ליהוה
Gen 24:27 כז ויאמר ברוך יהוה אלהי אדני אברהם אשר לא עזב חסדו ואמתו מעם אדני אנכי בדרך נחני יהוה בית אחי אדני
Gen 24:28 כח ותרץ הנער ותגד לבית אמה--כדברים האלה
Gen 24:29 כט ולרבקה אח ושמו לבן וירץ לבן אל האיש החוצה אל העין
Gen 24:30 ל ויהי כראת את הנזם ואת הצמדים על ידי אחתו וכשמעו את דברי רבקה אחתו לאמר כה דבר אלי האיש ויבא אל האיש והנה עמד על הגמלים על העין
Gen 24:31 לא ויאמר בוא ברוך יהוה למה תעמד בחוץ ואנכי פניתי הבית ומקום לגמלים
Gen 24:32 לב ויבא האיש הביתה ויפתח הגמלים ויתן תבן ומספוא לגמלים ומים לרחץ רגליו ורגלי האנשים אשר אתו
Gen 24:33 לג ויישם (ויושם) לפניו לאכל ויאמר לא אכל עד אם דברתי דברי ויאמר דבר
Gen 24:34 לד ויאמר  עבד אברהם אנכי
Gen 24:35 לה ויהוה ברך את אדני מאד--ויגדל ויתן לו צאן ובקר וכסף וזהב ועבדם ושפחת וגמלים וחמרים
Gen 24:36 לו ותלד שרה אשת אדני בן לאדני אחרי זקנתה ויתן לו את כל אשר לו
Gen 24:37 לז וישבעני אדני לאמר  לא תקח אשה לבני מבנות הכנעני אשר אנכי ישב בארצו
Gen 24:38 לח אם לא אל בית אבי תלך ואל משפחתי ולקחת אשה לבני
Gen 24:39 לט ואמר אל אדני  אלי לא תלך האשה אחרי
Gen 24:40 מ ויאמר אלי  יהוה אשר התהלכתי לפניו ישלח מלאכו אתך והצליח דרכך ולקחת אשה לבני ממשפחתי ומבית אבי
Gen 24:41 מא אז תנקה מאלתי כי תבוא אל משפחתי ואם לא יתנו לך והיית נקי מאלתי
Gen 24:42 מב ואבא היום אל העין ואמר יהוה אלהי אדני אברהם אם ישך נא מצליח דרכי אשר אנכי הלך עליה
Gen 24:43 מג הנה אנכי נצב על עין המים והיה העלמה היצאת לשאב ואמרתי אליה השקיני נא מעט מים מכדך
Gen 24:44 מד ואמרה אלי גם אתה שתה וגם לגמליך אשאב--הוא האשה אשר הכיח יהוה לבן אדני
Gen 24:45 מה אני טרם אכלה לדבר אל לבי והנה רבקה יצאת וכדה על שכמה ותרד העינה ותשאב ואמר אליה השקיני נא
Gen 24:46 מו ותמהר ותורד כדה מעליה ותאמר שתה וגם גמליך אשקה ואשת וגם הגמלים השקתה
Gen 24:47 מז ואשאל אתה ואמר בת מי את ותאמר בת בתואל בן נחור אשר ילדה לו מלכה ואשם הנזם על אפה והצמידים על ידיה
Gen 24:48 מח ואקד ואשתחוה ליהוה ואברך את יהוה אלהי אדני אברהם אשר הנחני בדרך אמת לקחת את בת אחי אדני לבנו
Gen 24:49 מט ועתה אם ישכם עשים חסד ואמת את אדני--הגידו לי ואם לא--הגידו לי ואפנה על ימין או על שמאל
Gen 24:50 נ ויען לבן ובתואל ויאמרו מיהוה יצא הדבר לא נוכל דבר אליך רע או טוב
Gen 24:51 נא הנה רבקה לפניך קח ולך ותהי אשה לבן אדניך כאשר דבר יהוה
Gen 24:52 נב ויהי כאשר שמע עבד אברהם את דבריהם וישתחו ארצה ליהוה
Gen 24:53 נג ויוצא העבד כלי כסף וכלי זהב ובגדים ויתן לרבקה ומגדנת--נתן לאחיה ולאמה
Gen 24:54 נד ויאכלו וישתו הוא והאנשים אשר עמו--וילינו ויקומו בבקר ויאמר שלחני לאדני
Gen 24:55 נה ויאמר אחיה ואמה תשב הנער אתנו ימים או עשור אחר תלך
Gen 24:56 נו ויאמר אלהם אל תאחרו אתי ויהוה הצליח דרכי שלחוני ואלכה לאדני
Gen 24:57 נז ויאמרו נקרא לנער ונשאלה את פיה
Gen 24:58 נח ויקראו לרבקה ויאמרו אליה התלכי עם האיש הזה ותאמר אלך
Gen 24:59 נט וישלחו את רבקה אחתם ואת מנקתה ואת עבד אברהם ואת אנשיו
Gen 24:60 ס ויברכו את רבקה ויאמרו לה--אחתנו את היי לאלפי רבבה ויירש זרעך את שער שנאיו
Gen 24:61 סא ותקם רבקה ונערתיה ותרכבנה על הגמלים ותלכנה אחרי האיש ויקח העבד את רבקה וילך
Gen 24:62 סב ויצחק בא מבוא באר לחי ראי והוא יושב בארץ הנגב
Gen 24:63 סג ויצא יצחק לשוח בשדה לפנות ערב וישא עיניו וירא והנה גמלים באים
Gen 24:64 סד ותשא רבקה את עיניה ותרא את יצחק ותפל מעל הגמל
Gen 24:65 סה ותאמר אל העבד מי האיש הלזה ההלך בשדה לקראתנו ויאמר העבד הוא אדני ותקח הצעיף ותתכס
Gen 24:66 סו ויספר העבד ליצחק את כל הדברים אשר עשה
Gen 24:67 סז ויבאה יצחק האהלה שרה אמו ויקח את רבקה ותהי לו לאשה ויאהבה וינחם יצחק אחרי אמו  {פ}