Gen 11:1 א ויהי כל הארץ שפה אחת ודברים אחדים
Gen 11:2 ב ויהי בנסעם מקדם וימצאו בקעה בארץ שנער וישבו שם
Gen 11:3 ג ויאמרו איש אל רעהו הבה נלבנה לבנים ונשרפה לשרפה ותהי להם הלבנה לאבן והחמר היה להם לחמר
Gen 11:4 ד ויאמרו הבה נבנה לנו עיר ומגדל וראשו בשמים ונעשה לנו שם  פן נפוץ על פני כל הארץ
Gen 11:5 ה וירד יהוה לראת את העיר ואת המגדל אשר בנו בני האדם
Gen 11:6 ו ויאמר יהוה הן עם אחד ושפה אחת לכלם וזה החלם לעשות ועתה לא יבצר מהם כל אשר יזמו לעשות
Gen 11:7 ז הבה נרדה ונבלה שם שפתם--אשר לא ישמעו איש שפת רעהו
Gen 11:8 ח ויפץ יהוה אתם משם על פני כל הארץ ויחדלו לבנת העיר
Gen 11:9 ט על כן קרא שמה בבל כי שם בלל יהוה שפת כל הארץ ומשם הפיצם יהוה על פני כל הארץ  {פ}
Gen 11:10 י אלה תולדת שם--שם בן מאת שנה ויולד את ארפכשד  שנתים אחר המבול
Gen 11:11 יא ויחי שם אחרי הולידו את ארפכשד חמש מאות שנה ויולד בנים ובנות  {ס}
Gen 11:12 יב וארפכשד חי חמש ושלשים שנה ויולד את שלח
Gen 11:13 יג ויחי ארפכשד אחרי הולידו את שלח שלש שנים וארבע מאות שנה ויולד בנים ובנות  {ס}
Gen 11:14 יד ושלח חי שלשים שנה ויולד את עבר
Gen 11:15 טו ויחי שלח אחרי הולידו את עבר שלש שנים וארבע מאות שנה ויולד בנים ובנות  {ס}
Gen 11:16 טז ויחי עבר ארבע ושלשים שנה ויולד את פלג
Gen 11:17 יז ויחי עבר אחרי הולידו את פלג שלשים שנה וארבע מאות שנה ויולד בנים ובנות  {ס}
Gen 11:18 יח ויחי פלג שלשים שנה ויולד את רעו
Gen 11:19 יט ויחי פלג אחרי הולידו את רעו תשע שנים ומאתים שנה ויולד בנים ובנות  {ס}
Gen 11:20 כ ויחי רעו שתים ושלשים שנה ויולד את שרוג
Gen 11:21 כא ויחי רעו אחרי הולידו את שרוג שבע שנים ומאתים שנה ויולד בנים ובנות  {ס}
Gen 11:22 כב ויחי שרוג שלשים שנה ויולד את נחור
Gen 11:23 כג ויחי שרוג אחרי הולידו את נחור--מאתים שנה ויולד בנים ובנות  {ס}
Gen 11:24 כד ויחי נחור תשע ועשרים שנה ויולד את תרח
Gen 11:25 כה ויחי נחור אחרי הולידו את תרח תשע עשרה שנה ומאת שנה ויולד בנים ובנות  {ס}
Gen 11:26 כו ויחי תרח שבעים שנה ויולד את אברם את נחור ואת הרן
Gen 11:27 כז ואלה תולדת תרח--תרח הוליד את אברם את נחור ואת הרן והרן הוליד את לוט
Gen 11:28 כח וימת הרן על פני תרח אביו בארץ מולדתו באור כשדים
Gen 11:29 כט ויקח אברם ונחור להם נשים  שם אשת אברם שרי ושם אשת נחור מלכה בת הרן אבי מלכה ואבי יסכה
Gen 11:30 ל ותהי שרי עקרה  אין לה ולד
Gen 11:31 לא ויקח תרח את אברם בנו ואת לוט בן הרן בן בנו ואת שרי כלתו אשת אברם בנו ויצאו אתם מאור כשדים ללכת ארצה כנען ויבאו עד חרן וישבו שם
Gen 11:32 לב ויהיו ימי תרח חמש שנים ומאתים שנה וימת תרח בחרן  {פ}