Gen 16:1 א ושרי אשת אברם לא ילדה לו ולה שפחה מצרית ושמה הגר
Gen 16:2 ב ותאמר שרי אל אברם הנה נא עצרני יהוה מלדת--בא נא אל שפחתי אולי אבנה ממנה וישמע אברם לקול שרי
Gen 16:3 ג ותקח שרי אשת אברם את הגר המצרית שפחתה מקץ עשר שנים לשבת אברם בארץ כנען ותתן אתה לאברם אישה לו לאשה
Gen 16:4 ד ויבא אל הגר ותהר ותרא כי הרתה ותקל גברתה בעיניה
Gen 16:5 ה ותאמר שרי אל אברם חמסי עליך--אנכי נתתי שפחתי בחיקך ותרא כי הרתה ואקל בעיניה ישפט יהוה ביני וביניך
Gen 16:6 ו ויאמר אברם אל שרי הנה שפחתך בידך--עשי לה הטוב בעיניך ותענה שרי ותברח מפניה
Gen 16:7 ז וימצאה מלאך יהוה על עין המים--במדבר  על העין בדרך שור
Gen 16:8 ח ויאמר הגר שפחת שרי אי מזה באת--ואנה תלכי ותאמר--מפני שרי גברתי אנכי ברחת
Gen 16:9 ט ויאמר לה מלאך יהוה שובי אל גברתך והתעני תחת ידיה
Gen 16:10 י ויאמר לה מלאך יהוה הרבה ארבה את זרעך ולא יספר מרב
Gen 16:11 יא ויאמר לה מלאך יהוה הנך הרה וילדת בן וקראת שמו ישמעאל כי שמע יהוה אל עניך
Gen 16:12 יב והוא יהיה פרא אדם--ידו בכל ויד כל בו ועל פני כל אחיו ישכן
Gen 16:13 יג ותקרא שם יהוה הדבר אליה אתה אל ראי  כי אמרה הגם הלם ראיתי--אחרי ראי
Gen 16:14 יד על כן קרא לבאר באר לחי ראי--הנה בין קדש ובין ברד
Gen 16:15 טו ותלד הגר לאברם בן ויקרא אברם שם בנו אשר ילדה הגר ישמעאל
Gen 16:16 טז ואברם בן שמנים שנה ושש שנים בלדת הגר את ישמעאל לאברם  {ס}