Gen 21:1 א ויהוה פקד את שרה כאשר אמר ויעש יהוה לשרה כאשר דבר
Gen 21:2 ב ותהר ותלד שרה לאברהם בן לזקניו למועד אשר דבר אתו אלהים
Gen 21:3 ג ויקרא אברהם את שם בנו הנולד לו אשר ילדה לו שרה--יצחק
Gen 21:4 ד וימל אברהם את יצחק בנו בן שמנת ימים כאשר צוה אתו אלהים
Gen 21:5 ה ואברהם בן מאת שנה בהולד לו את יצחק בנו
Gen 21:6 ו ותאמר שרה--צחק עשה לי אלהים  כל השמע יצחק לי
Gen 21:7 ז ותאמר מי מלל לאברהם היניקה בנים שרה  כי ילדתי בן לזקניו
Gen 21:8 ח ויגדל הילד ויגמל ויעש אברהם משתה גדול ביום הגמל את יצחק
Gen 21:9 ט ותרא שרה את בן הגר המצרית אשר ילדה לאברהם--מצחק
Gen 21:10 י ותאמר לאברהם גרש האמה הזאת ואת בנה  כי לא יירש בן האמה הזאת עם בני עם יצחק
Gen 21:11 יא וירע הדבר מאד בעיני אברהם על אודת בנו
Gen 21:12 יב ויאמר אלהים אל אברהם אל ירע בעיניך על הנער ועל אמתך--כל אשר תאמר אליך שרה שמע בקלה  כי ביצחק יקרא לך זרע
Gen 21:13 יג וגם את בן האמה לגוי אשימנו  כי זרעך הוא
Gen 21:14 יד וישכם אברהם בבקר ויקח לחם וחמת מים ויתן אל הגר שם על שכמה ואת הילד--וישלחה ותלך ותתע במדבר באר שבע
Gen 21:15 טו ויכלו המים מן החמת ותשלך את הילד תחת אחד השיחם
Gen 21:16 טז ותלך ותשב לה מנגד הרחק כמטחוי קשת כי אמרה אל אראה במות הילד ותשב מנגד ותשא את קלה ותבך
Gen 21:17 יז וישמע אלהים את קול הנער ויקרא מלאך אלהים אל הגר מן השמים ויאמר לה מה לך הגר אל תיראי כי שמע אלהים אל קול הנער באשר הוא שם
Gen 21:18 יח קומי שאי את הנער והחזיקי את ידך בו  כי לגוי גדול אשימנו
Gen 21:19 יט ויפקח אלהים את עיניה ותרא באר מים ותלך ותמלא את החמת מים ותשק את הנער
Gen 21:20 כ ויהי אלהים את הנער ויגדל וישב במדבר ויהי רבה קשת
Gen 21:21 כא וישב במדבר פארן ותקח לו אמו אשה מארץ מצרים  {פ}
Gen 21:22 כב ויהי בעת ההוא ויאמר אבימלך ופיכל שר צבאו אל אברהם לאמר  אלהים עמך בכל אשר אתה עשה
Gen 21:23 כג ועתה השבעה לי באלהים הנה אם תשקר לי ולניני ולנכדי כחסד אשר עשיתי עמך תעשה עמדי ועם הארץ אשר גרתה בה
Gen 21:24 כד ויאמר אברהם אנכי אשבע
Gen 21:25 כה והוכח אברהם את אבימלך על אדות באר המים אשר גזלו עבדי אבימלך
Gen 21:26 כו ויאמר אבימלך--לא ידעתי מי עשה את הדבר הזה וגם אתה לא הגדת לי וגם אנכי לא שמעתי--בלתי היום
Gen 21:27 כז ויקח אברהם צאן ובקר ויתן לאבימלך ויכרתו שניהם ברית
Gen 21:28 כח ויצב אברהם את שבע כבשת הצאן--לבדהן
Gen 21:29 כט ויאמר אבימלך אל אברהם  מה הנה שבע כבשת האלה אשר הצבת לבדנה
Gen 21:30 ל ויאמר--כי את שבע כבשת תקח מידי  בעבור תהיה לי לעדה כי חפרתי את הבאר הזאת
Gen 21:31 לא על כן קרא למקום ההוא--באר שבע  כי שם נשבעו שניהם
Gen 21:32 לב ויכרתו ברית בבאר שבע ויקם אבימלך ופיכל שר צבאו וישבו אל ארץ פלשתים
Gen 21:33 לג ויטע אשל בבאר שבע ויקרא שם--בשם יהוה אל עולם
Gen 21:34 לד ויגר אברהם בארץ פלשתים ימים רבים  {פ}