Hos 9:1 א אל תשמח ישראל אל גיל כעמים כי זנית מעל אלהיך אהבת אתנן על כל גרנות דגן
Hos 9:2 ב גרן ויקב לא ירעם ותירוש יכחש בה
Hos 9:3 ג לא ישבו בארץ יהוה ושב אפרים מצרים ובאשור טמא יאכלו
Hos 9:4 ד לא יסכו ליהוה יין ולא יערבו לו--זבחיהם כלחם אונים להם כל אכליו יטמאו  כי לחמם לנפשם לא יבוא בית יהוה
Hos 9:5 ה מה תעשו ליום מועד וליום חג יהוה
Hos 9:6 ו כי הנה הלכו משד מצרים תקבצם מף תקברם מחמד לכספם קמוש יירשם חוח באהליהם
Hos 9:7 ז באו ימי הפקדה באו ימי השלם--ידעו ישראל אויל הנביא משגע איש הרוח--על רב עונך ורבה משטמה
Hos 9:8 ח צפה אפרים עם אלהי נביא פח יקוש על כל דרכיו--משטמה בבית אלהיו
Hos 9:9 ט העמיקו שחתו כימי הגבעה יזכור עונם יפקוד חטאותם  {ס}
Hos 9:10 י כענבים במדבר מצאתי ישראל--כבכורה בתאנה בראשיתה ראיתי אבותיכם המה באו בעל פעור וינזרו לבשת ויהיו שקוצים כאהבם
Hos 9:11 יא אפרים כעוף יתעופף כבודם מלדה ומבטן ומהריון
Hos 9:12 יב כי אם יגדלו את בניהם ושכלתים מאדם  כי גם אוי להם בשורי מהם
Hos 9:13 יג אפרים כאשר ראיתי לצור שתולה בנוה ואפרים להוציא אל הרג בניו
Hos 9:14 יד תן להם יהוה מה תתן תן להם רחם משכיל ושדים צמקים
Hos 9:15 טו כל רעתם בגלגל כי שם שנאתים על רע מעלליהם מביתי אגרשם לא אוסף אהבתם כל שריהם סררים
Hos 9:16 טז הכה אפרים--שרשם יבש פרי בלי (בל) יעשון גם כי ילדון והמתי מחמדי בטנם
Hos 9:17 יז ימאסם אלהי כי לא שמעו לו ויהיו נדדים בגוים  {ס}