Hos 5:1 א שמעו זאת הכהנים והקשיבו בית ישראל ובית המלך האזינו--כי לכם המשפט  כי פח הייתם למצפה ורשת פרושה על תבור
Hos 5:2 ב ושחטה שטים העמיקו ואני מוסר לכלם
Hos 5:3 ג אני ידעתי אפרים וישראל לא נכחד ממני  כי עתה הזנית אפרים נטמא ישראל
Hos 5:4 ד לא יתנו מעלליהם לשוב אל אלהיהם  כי רוח זנונים בקרבם ואת יהוה לא ידעו
Hos 5:5 ה וענה גאון ישראל בפניו וישראל ואפרים יכשלו בעונם--כשל גם יהודה עמם
Hos 5:6 ו בצאנם ובבקרם ילכו לבקש את יהוה--ולא ימצאו  חלץ מהם
Hos 5:7 ז ביהוה בגדו כי בנים זרים ילדו עתה יאכלם חדש את חלקיהם  {ס}
Hos 5:8 ח תקעו שופר בגבעה חצצרה ברמה הריעו בית און אחריך בנימין
Hos 5:9 ט אפרים לשמה תהיה ביום תוכחה בשבטי ישראל הודעתי נאמנה
Hos 5:10 י היו שרי יהודה כמסיגי גבול עליהם אשפוך כמים עברתי
Hos 5:11 יא עשוק אפרים רצוץ משפט  כי הואיל הלך אחרי צו
Hos 5:12 יב ואני כעש לאפרים וכרקב לבית יהודה
Hos 5:13 יג וירא אפרים את חליו ויהודה את מזרו וילך אפרים אל אשור וישלח אל מלך ירב והוא לא יוכל לרפא לכם ולא יגהה מכם מזור
Hos 5:14 יד כי אנכי כשחל לאפרים וככפיר לבית יהודה אני אני אטרף ואלך אשא ואין מציל
Hos 5:15 טו אלך אשובה אל מקומי עד אשר יאשמו ובקשו פני  בצר להם ישחרנני