Hos 8:1 א אל חכך שפר כנשר על בית יהוה--יען עברו בריתי ועל תורתי פשעו
Hos 8:2 ב לי יזעקו אלהי ידענוך ישראל
Hos 8:3 ג זנח ישראל טוב אויב ירדפו
Hos 8:4 ד הם המליכו ולא ממני השירו ולא ידעתי כספם וזהבם עשו להם עצבים למען יכרת
Hos 8:5 ה זנח עגלך שמרון חרה אפי בם עד מתי לא יוכלו נקין
Hos 8:6 ו כי מישראל והוא--חרש עשהו ולא אלהים הוא  כי שבבים יהיה עגל שמרון
Hos 8:7 ז כי רוח יזרעו וסופתה יקצרו קמה אין לו צמח בלי יעשה קמח--אולי יעשה זרים יבלעהו
Hos 8:8 ח נבלע ישראל עתה היו בגוים ככלי אין חפץ בו
Hos 8:9 ט כי המה עלו אשור פרא בודד לו אפרים התנו אהבים
Hos 8:10 י גם כי יתנו בגוים עתה אקבצם ויחלו מעט ממשא מלך שרים
Hos 8:11 יא כי הרבה אפרים מזבחות לחטא  היו לו מזבחות לחטא
Hos 8:12 יב אכתוב (אכתב) לו--רבו (רבי) תורתי  כמו זר נחשבו
Hos 8:13 יג זבחי הבהבי יזבחו בשר ויאכלו--יהוה לא רצם עתה יזכר עונם ויפקד חטאותם--המה מצרים ישובו
Hos 8:14 יד וישכח ישראל את עשהו ויבן היכלות ויהודה הרבה ערים בצרות ושלחתי אש בעריו ואכלה ארמנתיה  {פ}