Hos 6:1 א לכו ונשובה אל יהוה כי הוא טרף וירפאנו יך ויחבשנו
Hos 6:2 ב יחינו מימים ביום השלישי יקמנו ונחיה לפניו
Hos 6:3 ג ונדעה נרדפה לדעת את יהוה כשחר נכון מצאו ויבוא כגשם לנו כמלקוש יורה ארץ
Hos 6:4 ד מה אעשה לך אפרים מה אעשה לך יהודה וחסדכם כענן בקר וכטל משכים הלך
Hos 6:5 ה על כן חצבתי בנביאים--הרגתים באמרי פי ומשפטיך אור יצא
Hos 6:6 ו כי חסד חפצתי ולא זבח ודעת אלהים מעלות
Hos 6:7 ז והמה כאדם עברו ברית שם בגדו בי
Hos 6:8 ח גלעד קרית פעלי און--עקבה מדם
Hos 6:9 ט וכחכי איש גדודים חבר כהנים דרך ירצחו שכמה  כי זמה עשו
Hos 6:10 י בבית ישראל ראיתי שעריריה (שערוריה) שם זנות לאפרים נטמא ישראל
Hos 6:11 יא גם יהודה שת קציר לך בשובי שבות עמי  {פ}