Job 34:1 א                  ויען אליהוא ויאמר
Job 34:2 ב  שמעו חכמים מלי    וידעים האזינו לי
Job 34:3 ג  כי-אזן מלין תבחן    וחך יטעם לאכל
Job 34:4 ד  משפט נבחרה-לנו    נדעה בינינו מה-טוב
Job 34:5 ה  כי-אמר איוב צדקתי    ואל הסיר משפטי
Job 34:6 ו  על-משפטי אכזב    אנוש חצי בלי-פשע
Job 34:7 ז  מי-גבר כאיוב    ישתה-לעג כמים
Job 34:8 ח  וארח לחברה עם-פעלי און    וללכת עם-אנשי-רשע
Job 34:9 ט  כי-אמר לא יסכן-גבר--    ברצתו עם-אלהים
Job 34:10 י  לכן אנשי לבב--    שמעו-לי חללה לאל מרשע    ושדי מעול
Job 34:11 יא  כי פעל אדם ישלם-לו    וכארח איש ימצאנו
Job 34:12 יב  אף-אמנם אל לא-ירשיע    ושדי לא-יעות משפט
Job 34:13 יג  מי-פקד עליו ארצה    ומי שם תבל כלה
Job 34:14 יד  אם-ישים אליו לבו    רוחו ונשמתו אליו יאסף
Job 34:15 טו  יגוע כל-בשר יחד    ואדם על-עפר ישוב
Job 34:16 טז  ואם-בינה שמעה-זאת    האזינה לקול מלי
Job 34:17 יז  האף שונא משפט יחבוש    ואם-צדיק כביר תרשיע
Job 34:18 יח  האמר למלך בליעל--    רשע אל-נדיבים
Job 34:19 יט  אשר לא-נשא פני שרים    ולא נכר-שוע לפני-דל כי-מעשה ידיו    כלם
Job 34:20 כ  רגע ימתו--    וחצות לילה יגעשו עם ויעברו    ויסירו אביר לא ביד
Job 34:21 כא  כי-עיניו על-דרכי-איש    וכל-צעדיו יראה
Job 34:22 כב  אין-חשך ואין צלמות--    להסתר שם פעלי און
Job 34:23 כג  כי לא על-איש ישים עוד--    להלך אל-אל במשפט
Job 34:24 כד  ירע כבירים לא-חקר    ויעמד אחרים תחתם
Job 34:25 כה  לכן--יכיר מעבדיהם    והפך לילה וידכאו
Job 34:26 כו  תחת-רשעים ספקם--    במקום ראים
Job 34:27 כז  אשר על-כן סרו מאחריו    וכל-דרכיו לא השכילו
Job 34:28 כח  להביא עליו צעקת-דל    וצעקת עניים ישמע
Job 34:29 כט  והוא ישקט ומי ירשע--    ויסתר פנים ומי ישורנו ועל-גוי ועל-אדם    יחד
Job 34:30 ל  ממלך אדם חנף--    ממקשי עם
Job 34:31 לא  כי-אל-אל האמר נשאתי--    לא אחבל
Job 34:32 לב  בלעדי אחזה אתה הרני    אם-עול פעלתי לא אסיף
Job 34:33 לג  המעמך ישלמנה כי-מאסת--כי-אתה תבחר ולא-אני    ומה-ידעת דבר
Job 34:34 לד  אנשי לבב יאמרו לי    וגבר חכם שמע לי
Job 34:35 לה  איוב לא-בדעת ידבר    ודבריו לא בהשכיל
Job 34:36 לו  אבי--יבחן איוב עד-נצח    על-תשבת באנשי-און
Job 34:37 לז  כי יסיף על-חטאתו פשע בינינו יספוק    וירב אמריו לאל