Job 6:1 א                  ויען איוב ויאמר
Job 6:2 ב  לו--שקול ישקל כעשי    והיתי (והותי) במאזנים ישאו-יחד
Job 6:3 ג  כי-עתה--מחול ימים יכבד    על-כן דברי לעו
Job 6:4 ד  כי חצי שדי עמדי--אשר חמתם שתה רוחי    בעותי אלוה יערכוני
Job 6:5 ה  הינהק-פרא עלי-דשא    אם יגעה-שור על-בלילו
Job 6:6 ו  היאכל תפל מבלי-מלח    אם-יש-טעם בריר חלמות
Job 6:7 ז  מאנה לנגוע נפשי    המה כדוי לחמי
Job 6:8 ח  מי-יתן תבוא שאלתי    ותקותי יתן אלוה
Job 6:9 ט  ויאל אלוה וידכאני    יתר ידו ויבצעני
Job 6:10 י  ותהי-עוד נחמתי--    ואסלדה בחילה לא יחמול כי-לא כחדתי    אמרי קדוש
Job 6:11 יא  מה-כחי כי-איחל    ומה-קצי כי-אאריך נפשי
Job 6:12 יב  אם-כח אבנים כחי    אם-בשרי נחוש
Job 6:13 יג  האם אין עזרתי בי    ותשיה נדחה ממני
Job 6:14 יד  למס מרעהו חסד    ויראת שדי יעזוב
Job 6:15 טו  אחי בגדו כמו-נחל    כאפיק נחלים יעברו
Job 6:16 טז  הקדרים מני-קרח    עלימו יתעלם-שלג
Job 6:17 יז  בעת יזרבו נצמתו    בחמו נדעכו ממקומם
Job 6:18 יח  ילפתו ארחות דרכם    יעלו בתהו ויאבדו
Job 6:19 יט  הביטו ארחות תמא    הליכת שבא קוו-למו
Job 6:20 כ  בשו כי-בטח    באו עדיה ויחפרו
Job 6:21 כא  כי-עתה הייתם לא    תראו חתת ותיראו
Job 6:22 כב  הכי-אמרתי הבו לי    ומכחכם שחדו בעדי
Job 6:23 כג  ומלטוני מיד-צר    ומיד עריצים תפדוני
Job 6:24 כד  הורוני ואני אחריש    ומה-שגיתי הבינו לי
Job 6:25 כה  מה-נמרצו אמרי-ישר    ומה-יוכיח הוכח מכם
Job 6:26 כו  הלהוכח מלים תחשבו    ולרוח אמרי נואש
Job 6:27 כז  אף-על-יתום תפילו    ותכרו על-ריעכם
Job 6:28 כח  ועתה הואילו פנו-בי    ועל-פניכם אם-אכזב
Job 6:29 כט  שובו-נא אל-תהי עולה    ושבי (ושבו) עוד צדקי-בה
Job 6:30 ל  היש-בלשוני עולה    אם-חכי לא-יבין הוות