Job 8:1 א                  ויען בלדד השוחי ויאמר
Job 8:2 ב  עד-אן תמלל-אלה    ורוח כביר אמרי-פיך
Job 8:3 ג  האל יעות משפט    ואם-שדי יעות-צדק
Job 8:4 ד  אם-בניך חטאו-לו    וישלחם ביד-פשעם
Job 8:5 ה  אם-אתה תשחר אל-אל    ואל-שדי תתחנן
Job 8:6 ו  אם-זך וישר אתה    כי-עתה יעיר עליך ושלם נות צדקך
Job 8:7 ז  והיה ראשיתך מצער    ואחריתך ישגה מאד
Job 8:8 ח  כי-שאל-נא לדר רישון    וכונן לחקר אבותם
Job 8:9 ט  כי-תמול אנחנו ולא נדע    כי צל ימינו עלי-ארץ
Job 8:10 י  הלא-הם יורוך יאמרו לך    ומלבם יוצאו מלים
Job 8:11 יא  היגאה-גמא בלא בצה    ישגה-אחו בלי-מים
Job 8:12 יב  עדנו באבו לא יקטף    ולפני כל-חציר ייבש
Job 8:13 יג  כן--ארחות כל-שכחי אל    ותקות חנף תאבד
Job 8:14 יד  אשר-יקוט כסלו    ובית עכביש מבטחו
Job 8:15 טו  ישען על-ביתו ולא יעמד    יחזיק בו ולא יקום
Job 8:16 טז  רטב הוא לפני-שמש    ועל גנתו ינקתו תצא
Job 8:17 יז  על-גל שרשיו יסבכו    בית אבנים יחזה
Job 8:18 יח  אם-יבלענו ממקמו    וכחש בו לא ראיתיך
Job 8:19 יט  הן-הוא משוש דרכו    ומעפר אחר יצמחו
Job 8:20 כ  הן-אל לא ימאס-תם    ולא-יחזיק ביד-מרעים
Job 8:21 כא  עד-ימלה שחוק פיך    ושפתיך תרועה
Job 8:22 כב  שנאיך ילבשו-בשת    ואהל רשעים איננו