Job 33:1 א  ואולם--שמע-נא איוב מלי    וכל-דברי האזינה
Job 33:2 ב  הנה-נא פתחתי פי    דברה לשוני בחכי
Job 33:3 ג  ישר-לבי אמרי    ודעת שפתי ברור מללו
Job 33:4 ד  רוח-אל עשתני    ונשמת שדי תחיני
Job 33:5 ה  אם-תוכל השיבני    ערכה לפני התיצבה
Job 33:6 ו  הן-אני כפיך לאל    מחמר קרצתי גם-אני
Job 33:7 ז  הנה אמתי לא תבעתך    ואכפי עליך לא-יכבד
Job 33:8 ח  אך אמרת באזני    וקול מלין אשמע
Job 33:9 ט  זך אני בלי-פשע    חף אנכי ולא עון לי
Job 33:10 י  הן תנואות עלי ימצא    יחשבני לאויב לו
Job 33:11 יא  ישם בסד רגלי    ישמר כל-ארחתי
Job 33:12 יב  הן-זאת לא-צדקת אענך    כי-ירבה אלוה מאנוש
Job 33:13 יג  מדוע אליו ריבות    כי כל-דבריו לא יענה
Job 33:14 יד  כי-באחת ידבר-אל    ובשתים לא ישורנה
Job 33:15 טו  בחלום חזיון לילה--בנפל תרדמה על-אנשים    בתנומות עלי משכב
Job 33:16 טז  אז יגלה אזן אנשים    ובמסרם יחתם
Job 33:17 יז  להסיר אדם מעשה    וגוה מגבר יכסה
Job 33:18 יח  יחשך נפשו מני-שחת    וחיתו מעבר בשלח
Job 33:19 יט  והוכח במכאוב על-משכבו    וריב (ורוב) עצמיו אתן
Job 33:20 כ  וזהמתו חיתו לחם    ונפשו מאכל תאוה
Job 33:21 כא  יכל בשרו מראי    ושפי (ושפו) עצמתיו לא ראו
Job 33:22 כב  ותקרב לשחת נפשו    וחיתו לממתים
Job 33:23 כג  אם-יש עליו מלאך--מליץ אחד מני-אלף    להגיד לאדם ישרו
Job 33:24 כד  ויחננו--ויאמר פדעהו מרדת שחת    מצאתי כפר
Job 33:25 כה  רטפש בשרו מנער    ישוב לימי עלומיו
Job 33:26 כו  יעתר אל-אלוה וירצהו    וירא פניו בתרועה וישב לאנוש    צדקתו
Job 33:27 כז  ישר על-אנשים ויאמר חטאתי וישר העויתי    ולא-שוה לי
Job 33:28 כח  פדה נפשי (נפשו) מעבר בשחת    וחיתי (וחיתו) באור תראה
Job 33:29 כט  הן-כל-אלה יפעל-אל--    פעמים שלוש עם-גבר
Job 33:30 ל  להשיב נפשו מני-שחת--    לאור באור החיים
Job 33:31 לא  הקשב איוב שמע-לי    החרש ואנכי אדבר
Job 33:32 לב  אם-יש-מלין השיבני    דבר כי-חפצתי צדקך
Job 33:33 לג  אם-אין אתה שמע-לי    החרש ואאלפך חכמה