Eze 30:1 א ויהי דבר יהוה אלי לאמר
Eze 30:2 ב בן אדם--הנבא ואמרת כה אמר אדני יהוה  הילילו הה ליום
Eze 30:3 ג כי קרוב יום וקרוב יום ליהוה  יום ענן עת גוים יהיה
Eze 30:4 ד ובאה חרב במצרים והיתה חלחלה בכוש בנפל חלל במצרים ולקחו המונה ונהרסו יסדותיה
Eze 30:5 ה כוש ופוט ולוד וכל הערב וכוב ובני ארץ הברית--אתם בחרב יפלו  {פ}
Eze 30:6 ו כה אמר יהוה ונפלו סמכי מצרים וירד גאון עזה ממגדל סונה בחרב יפלו בה--נאם אדני יהוה
Eze 30:7 ז ונשמו בתוך ארצות נשמות ועריו בתוך ערים נחרבות תהיינה
Eze 30:8 ח וידעו כי אני יהוה בתתי אש במצרים ונשברו כל עזריה
Eze 30:9 ט ביום ההוא יצאו מלאכים מלפני בצים להחריד את כוש בטח והיתה חלחלה בהם ביום מצרים כי הנה באה  {ס}
Eze 30:10 י כה אמר אדני יהוה  והשבתי את המון מצרים ביד נבוכדראצר מלך בבל
Eze 30:11 יא הוא ועמו אתו עריצי גוים--מובאים לשחת הארץ והריקו חרבותם על מצרים ומלאו את הארץ חלל
Eze 30:12 יב ונתתי יארים חרבה ומכרתי את הארץ ביד רעים והשמתי ארץ ומלאה ביד זרים--אני יהוה דברתי  {ס}
Eze 30:13 יג כה אמר אדני יהוה והאבדתי גלולים והשבתי אלילים מנף ונשיא מארץ מצרים לא יהיה עוד ונתתי יראה בארץ מצרים
Eze 30:14 יד והשמתי את פתרוס ונתתי אש בצען ועשיתי שפטים בנא
Eze 30:15 טו ושפכתי חמתי על סין מעוז מצרים והכרתי את המון נא
Eze 30:16 טז ונתתי אש במצרים--חול תחיל (תחול) סין ונא תהיה להבקע ונף צרי יומם
Eze 30:17 יז בחורי און ופי בסת בחרב יפלו והנה בשבי תלכנה
Eze 30:18 יח ובתחפנחס חשך היום בשברי שם את מטות מצרים ונשבת בה גאון עזה היא ענן יכסנה ובנותיה בשבי תלכנה
Eze 30:19 יט ועשיתי שפטים במצרים וידעו כי אני יהוה  {פ}
Eze 30:20 כ ויהי באחת עשרה שנה בראשון בשבעה לחדש היה דבר יהוה אלי לאמר
Eze 30:21 כא בן אדם את זרוע פרעה מלך מצרים שברתי והנה לא חבשה לתת רפאות לשום חתול לחבשה לחזקה--לתפש בחרב  {ס}
Eze 30:22 כב לכן כה אמר אדני יהוה הנני אל פרעה מלך מצרים ושברתי את זרעתיו את החזקה ואת הנשברת והפלתי את החרב מידו
Eze 30:23 כג והפצותי את מצרים בגוים וזריתם בארצות
Eze 30:24 כד וחזקתי את זרעות מלך בבל ונתתי את חרבי בידו ושברתי את זרעות פרעה ונאק נאקות חלל לפניו
Eze 30:25 כה והחזקתי את זרעות מלך בבל וזרעות פרעה תפלנה וידעו כי אני יהוה בתתי חרבי ביד מלך בבל ונטה אותה אל ארץ מצרים
Eze 30:26 כו והפצותי את מצרים בגוים וזריתי אותם בארצות וידעו כי אני יהוה  {פ}