Gen 22:1 א ויהי אחר הדברים האלה והאלהים נסה את אברהם ויאמר אליו אברהם ויאמר הנני
Gen 22:2 ב ויאמר קח נא את בנך את יחידך אשר אהבת את יצחק ולך לך אל ארץ המריה והעלהו שם לעלה על אחד ההרים אשר אמר אליך
Gen 22:3 ג וישכם אברהם בבקר ויחבש את חמרו ויקח את שני נעריו אתו ואת יצחק בנו ויבקע עצי עלה ויקם וילך אל המקום אשר אמר לו האלהים
Gen 22:4 ד ביום השלישי וישא אברהם את עיניו וירא את המקום--מרחק
Gen 22:5 ה ויאמר אברהם אל נעריו שבו לכם פה עם החמור ואני והנער נלכה עד כה ונשתחוה ונשובה אליכם
Gen 22:6 ו ויקח אברהם את עצי העלה וישם על יצחק בנו ויקח בידו את האש ואת המאכלת וילכו שניהם יחדו
Gen 22:7 ז ויאמר יצחק אל אברהם אביו ויאמר אבי ויאמר הנני בני ויאמר הנה האש והעצים ואיה השה לעלה
Gen 22:8 ח ויאמר אברהם אלהים יראה לו השה לעלה בני וילכו שניהם יחדו
Gen 22:9 ט ויבאו אל המקום אשר אמר לו האלהים ויבן שם אברהם את המזבח ויערך את העצים ויעקד את יצחק בנו וישם אתו על המזבח ממעל לעצים
Gen 22:10 י וישלח אברהם את ידו ויקח את המאכלת לשחט את בנו
Gen 22:11 יא ויקרא אליו מלאך יהוה מן השמים ויאמר אברהם אברהם ויאמר הנני
Gen 22:12 יב ויאמר אל תשלח ידך אל הנער ואל תעש לו מאומה  כי עתה ידעתי כי ירא אלהים אתה ולא חשכת את בנך את יחידך ממני
Gen 22:13 יג וישא אברהם את עיניו וירא והנה איל אחר נאחז בסבך בקרניו וילך אברהם ויקח את האיל ויעלהו לעלה תחת בנו
Gen 22:14 יד ויקרא אברהם שם המקום ההוא יהוה יראה אשר יאמר היום בהר יהוה יראה
Gen 22:15 טו ויקרא מלאך יהוה אל אברהם שנית מן השמים
Gen 22:16 טז ויאמר בי נשבעתי נאם יהוה  כי יען אשר עשית את הדבר הזה ולא חשכת את בנך את יחידך
Gen 22:17 יז כי ברך אברכך והרבה ארבה את זרעך ככוכבי השמים וכחול אשר על שפת הים וירש זרעך את שער איביו
Gen 22:18 יח והתברכו בזרעך כל גויי הארץ עקב אשר שמעת בקלי
Gen 22:19 יט וישב אברהם אל נעריו ויקמו וילכו יחדו אל באר שבע וישב אברהם בבאר שבע  {פ}
Gen 22:20 כ ויהי אחרי הדברים האלה ויגד לאברהם לאמר  הנה ילדה מלכה גם הוא בנים--לנחור אחיך
Gen 22:21 כא את עוץ בכרו ואת בוז אחיו ואת קמואל אבי ארם
Gen 22:22 כב ואת כשד ואת חזו ואת פלדש ואת ידלף ואת בתואל
Gen 22:23 כג ובתואל ילד את רבקה שמנה אלה ילדה מלכה לנחור אחי אברהם
Gen 22:24 כד ופילגשו ושמה ראומה ותלד גם הוא את טבח ואת גחם ואת תחש ואת מעכה  {פ}