Gen 37:1 א וישב יעקב בארץ מגורי אביו--בארץ כנען
Gen 37:2 ב אלה תלדות יעקב יוסף בן שבע עשרה שנה היה רעה את אחיו בצאן והוא נער את בני בלהה ואת בני זלפה נשי אביו ויבא יוסף את דבתם רעה אל אביהם
Gen 37:3 ג וישראל אהב את יוסף מכל בניו--כי בן זקנים הוא לו ועשה לו כתנת פסים
Gen 37:4 ד ויראו אחיו כי אתו אהב אביהם מכל אחיו--וישנאו אתו ולא יכלו דברו לשלם
Gen 37:5 ה ויחלם יוסף חלום ויגד לאחיו ויוספו עוד שנא אתו
Gen 37:6 ו ויאמר אליהם  שמעו נא החלום הזה אשר חלמתי
Gen 37:7 ז והנה אנחנו מאלמים אלמים בתוך השדה והנה קמה אלמתי וגם נצבה והנה תסבינה אלמתיכם ותשתחוין לאלמתי
Gen 37:8 ח ויאמרו לו אחיו המלך תמלך עלינו אם משול תמשל בנו ויוספו עוד שנא אתו על חלמתיו ועל דבריו
Gen 37:9 ט ויחלם עוד חלום אחר ויספר אתו לאחיו ויאמר הנה חלמתי חלום עוד והנה השמש והירח ואחד עשר כוכבים משתחוים לי
Gen 37:10 י ויספר אל אביו ואל אחיו ויגער בו אביו ויאמר לו מה החלום הזה אשר חלמת  הבוא נבוא אני ואמך ואחיך להשתחות לך ארצה
Gen 37:11 יא ויקנאו בו אחיו ואביו שמר את הדבר
Gen 37:12 יב וילכו אחיו לרעות את צאן אביהם בשכם
Gen 37:13 יג ויאמר ישראל אל יוסף הלוא אחיך רעים בשכם--לכה ואשלחך אליהם ויאמר לו הנני
Gen 37:14 יד ויאמר לו לך נא ראה את שלום אחיך ואת שלום הצאן והשבני דבר וישלחהו מעמק חברון ויבא שכמה
Gen 37:15 טו וימצאהו איש והנה תעה בשדה וישאלהו האיש לאמר מה תבקש
Gen 37:16 טז ויאמר את אחי אנכי מבקש הגידה נא לי איפה הם רעים
Gen 37:17 יז ויאמר האיש נסעו מזה--כי שמעתי אמרים נלכה דתינה וילך יוסף אחר אחיו וימצאם בדתן
Gen 37:18 יח ויראו אתו מרחק ובטרם יקרב אליהם ויתנכלו אתו להמיתו
Gen 37:19 יט ויאמרו איש אל אחיו  הנה בעל החלמות הלזה--בא
Gen 37:20 כ ועתה לכו ונהרגהו ונשלכהו באחד הברות ואמרנו חיה רעה אכלתהו ונראה מה יהיו חלמתיו
Gen 37:21 כא וישמע ראובן ויצלהו מידם ויאמר לא נכנו נפש
Gen 37:22 כב ויאמר אלהם ראובן אל תשפכו דם--השליכו אתו אל הבור הזה אשר במדבר ויד אל תשלחו בו  למען הציל אתו מידם להשיבו אל אביו
Gen 37:23 כג ויהי כאשר בא יוסף אל אחיו ויפשיטו את יוסף את כתנתו את כתנת הפסים אשר עליו
Gen 37:24 כד ויקחהו--וישלכו אתו הברה והבור רק אין בו מים
Gen 37:25 כה וישבו לאכל לחם וישאו עיניהם ויראו והנה ארחת ישמעאלים באה מגלעד וגמליהם נשאים נכאת וצרי ולט--הולכים להוריד מצרימה
Gen 37:26 כו ויאמר יהודה אל אחיו  מה בצע כי נהרג את אחינו וכסינו את דמו
Gen 37:27 כז לכו ונמכרנו לישמעאלים וידנו אל תהי בו כי אחינו בשרנו הוא וישמעו אחיו
Gen 37:28 כח ויעברו אנשים מדינים סחרים וימשכו ויעלו את יוסף מן הבור וימכרו את יוסף לישמעאלים בעשרים כסף ויביאו את יוסף מצרימה
Gen 37:29 כט וישב ראובן אל הבור והנה אין יוסף בבור ויקרע את בגדיו
Gen 37:30 ל וישב אל אחיו ויאמר  הילד איננו ואני אנה אני בא
Gen 37:31 לא ויקחו את כתנת יוסף וישחטו שעיר עזים ויטבלו את הכתנת בדם
Gen 37:32 לב וישלחו את כתנת הפסים ויביאו אל אביהם ויאמרו זאת מצאנו  הכר נא הכתנת בנך הוא--אם לא
Gen 37:33 לג ויכירה ויאמר כתנת בני חיה רעה אכלתהו טרף טרף יוסף
Gen 37:34 לד ויקרע יעקב שמלתיו וישם שק במתניו ויתאבל על בנו ימים רבים
Gen 37:35 לה ויקמו כל בניו וכל בנתיו לנחמו וימאן להתנחם ויאמר כי ארד אל בני אבל שאלה ויבך אתו אביו
Gen 37:36 לו והמדנים--מכרו אתו אל מצרים  לפוטיפר סריס פרעה שר הטבחים  {פ}