Gen 9:1 א ויברך אלהים את נח ואת בניו ויאמר להם פרו ורבו ומלאו את הארץ
Gen 9:2 ב ומוראכם וחתכם יהיה על כל חית הארץ ועל כל עוף השמים בכל אשר תרמש האדמה ובכל דגי הים בידכם נתנו
Gen 9:3 ג כל רמש אשר הוא חי לכם יהיה לאכלה  כירק עשב נתתי לכם את כל
Gen 9:4 ד אך בשר בנפשו דמו לא תאכלו
Gen 9:5 ה ואך את דמכם לנפשתיכם אדרש מיד כל חיה אדרשנו ומיד האדם מיד איש אחיו--אדרש את נפש האדם
Gen 9:6 ו שפך דם האדם באדם דמו ישפך  כי בצלם אלהים עשה את האדם
Gen 9:7 ז ואתם פרו ורבו שרצו בארץ ורבו בה  {ס}
Gen 9:8 ח ויאמר אלהים אל נח ואל בניו אתו לאמר
Gen 9:9 ט ואני הנני מקים את בריתי אתכם ואת זרעכם אחריכם
Gen 9:10 י ואת כל נפש החיה אשר אתכם בעוף בבהמה ובכל חית הארץ אתכם מכל יצאי התבה לכל חית הארץ
Gen 9:11 יא והקמתי את בריתי אתכם ולא יכרת כל בשר עוד ממי המבול ולא יהיה עוד מבול לשחת הארץ
Gen 9:12 יב ויאמר אלהים זאת אות הברית אשר אני נתן ביני וביניכם ובין כל נפש חיה אשר אתכם--לדרת עולם
Gen 9:13 יג את קשתי נתתי בענן והיתה לאות ברית ביני ובין הארץ
Gen 9:14 יד והיה בענני ענן על הארץ ונראתה הקשת בענן
Gen 9:15 טו וזכרתי את בריתי אשר ביני וביניכם ובין כל נפש חיה בכל בשר ולא יהיה עוד המים למבול לשחת כל בשר
Gen 9:16 טז והיתה הקשת בענן וראיתיה לזכר ברית עולם בין אלהים ובין כל נפש חיה בכל בשר אשר על הארץ
Gen 9:17 יז ויאמר אלהים אל נח  זאת אות הברית אשר הקמתי ביני ובין כל בשר אשר על הארץ  {פ}
Gen 9:18 יח ויהיו בני נח היצאים מן התבה--שם וחם ויפת וחם הוא אבי כנען
Gen 9:19 יט שלשה אלה בני נח ומאלה נפצה כל הארץ
Gen 9:20 כ ויחל נח איש האדמה ויטע כרם
Gen 9:21 כא וישת מן היין וישכר ויתגל בתוך אהלה
Gen 9:22 כב וירא חם אבי כנען את ערות אביו ויגד לשני אחיו בחוץ
Gen 9:23 כג ויקח שם ויפת את השמלה וישימו על שכם שניהם וילכו אחרנית ויכסו את ערות אביהם ופניהם אחרנית וערות אביהם לא ראו
Gen 9:24 כד וייקץ נח מיינו וידע את אשר עשה לו בנו הקטן
Gen 9:25 כה ויאמר ארור כנען  עבד עבדים יהיה לאחיו
Gen 9:26 כו ויאמר ברוך יהוה אלהי שם ויהי כנען עבד למו
Gen 9:27 כז יפת אלהים ליפת וישכן באהלי שם ויהי כנען עבד למו
Gen 9:28 כח ויחי נח אחר המבול שלש מאות שנה וחמשים שנה
Gen 9:29 כט ויהיו כל ימי נח תשע מאות שנה וחמשים שנה וימת  {פ}