Lam 3:1 א אני הגבר ראה עני בשבט עברתו
Lam 3:2 ב אותי נהג וילך חשך ולא אור
Lam 3:3 ג אך בי ישב יהפך ידו כל היום  {ס}
Lam 3:4 ד בלה בשרי ועורי שבר עצמותי
Lam 3:5 ה בנה עלי ויקף ראש ותלאה
Lam 3:6 ו במחשכים הושיבני כמתי עולם  {ס}
Lam 3:7 ז גדר בעדי ולא אצא הכביד נחשתי
Lam 3:8 ח גם כי אזעק ואשוע שתם תפלתי
Lam 3:9 ט גדר דרכי בגזית נתיבתי עוה  {ס}
Lam 3:10 י דב ארב הוא לי אריה (ארי) במסתרים
Lam 3:11 יא דרכי סורר ויפשחני שמני שמם
Lam 3:12 יב דרך קשתו ויציבני כמטרא לחץ  {ס}
Lam 3:13 יג הביא בכליתי בני אשפתו
Lam 3:14 יד הייתי שחק לכל עמי נגינתם כל היום
Lam 3:15 טו השביעני במרורים הרוני לענה  {ס}
Lam 3:16 טז ויגרס בחצץ שני הכפישני באפר
Lam 3:17 יז ותזנח משלום נפשי נשיתי טובה
Lam 3:18 יח ואמר אבד נצחי ותוחלתי מיהוה  {ס}
Lam 3:19 יט זכר עניי ומרודי לענה וראש
Lam 3:20 כ זכור תזכור ותשיח (ותשוח) עלי נפשי
Lam 3:21 כא זאת אשיב אל לבי על כן אוחיל  {ס}
Lam 3:22 כב חסדי יהוה כי לא תמנו כי לא כלו רחמיו
Lam 3:23 כג חדשים לבקרים רבה אמונתך
Lam 3:24 כד חלקי יהוה אמרה נפשי על כן אוחיל לו  {ס}
Lam 3:25 כה טוב יהוה לקוו לנפש תדרשנו
Lam 3:26 כו טוב ויחיל ודומם לתשועת יהוה
Lam 3:27 כז טוב לגבר כי ישא על בנעוריו  {ס}
Lam 3:28 כח ישב בדד וידם כי נטל עליו
Lam 3:29 כט יתן בעפר פיהו אולי יש תקוה
Lam 3:30 ל יתן למכהו לחי ישבע בחרפה  {ס}
Lam 3:31 לא כי לא יזנח לעולם אדני
Lam 3:32 לב כי אם הוגה ורחם כרב חסדיו
Lam 3:33 לג כי לא ענה מלבו ויגה בני איש  {ס}
Lam 3:34 לד לדכא תחת רגליו כל אסירי ארץ
Lam 3:35 לה להטות משפט גבר נגד פני עליון
Lam 3:36 לו לעות אדם בריבו אדני לא ראה  {ס}
Lam 3:37 לז מי זה אמר ותהי אדני לא צוה
Lam 3:38 לח מפי עליון לא תצא הרעות והטוב
Lam 3:39 לט מה יתאונן אדם חי גבר על חטאו  {ס}
Lam 3:40 מ נחפשה דרכינו ונחקרה ונשובה עד יהוה
Lam 3:41 מא נשא לבבנו אל כפים אל אל בשמים
Lam 3:42 מב נחנו פשענו ומרינו אתה לא סלחת  {ס}
Lam 3:43 מג סכותה באף ותרדפנו הרגת לא חמלת
Lam 3:44 מד סכותה בענן לך מעבור תפלה
Lam 3:45 מה סחי ומאוס תשימנו בקרב העמים  {ס}
Lam 3:46 מו פצו עלינו פיהם כל איבינו
Lam 3:47 מז פחד ופחת היה לנו השאת והשבר
Lam 3:48 מח פלגי מים תרד עיני על שבר בת עמי  {ס}
Lam 3:49 מט עיני נגרה ולא תדמה מאין הפגות
Lam 3:50 נ עד ישקיף וירא יהוה משמים
Lam 3:51 נא עיני עוללה לנפשי מכל בנות עירי  {ס}
Lam 3:52 נב צוד צדוני כצפור איבי חנם
Lam 3:53 נג צמתו בבור חיי וידו אבן בי
Lam 3:54 נד צפו מים על ראשי אמרתי נגזרתי  {ס}
Lam 3:55 נה קראתי שמך יהוה מבור תחתיות
Lam 3:56 נו קולי שמעת  אל תעלם אזנך לרוחתי לשועתי
Lam 3:57 נז קרבת ביום אקראך אמרת אל תירא  {ס}
Lam 3:58 נח רבת אדני ריבי נפשי גאלת חיי
Lam 3:59 נט ראיתה יהוה עותתי שפטה משפטי
Lam 3:60 ס ראיתה כל נקמתם--כל מחשבתם לי  {ס}
Lam 3:61 סא שמעת חרפתם יהוה כל מחשבתם עלי
Lam 3:62 סב שפתי קמי והגיונם עלי כל היום
Lam 3:63 סג שבתם וקימתם הביטה אני מנגינתם  {ס}
Lam 3:64 סד תשיב להם גמול יהוה כמעשה ידיהם
Lam 3:65 סה תתן להם מגנת לב תאלתך להם
Lam 3:66 סו תרדף באף ותשמידם מתחת שמי יהוה  {פ}