Jer 48:1 א למואב כה אמר יהוה צבאות אלהי ישראל הוי אל נבו כי שדדה הבישה נלכדה קריתים הבישה המשגב וחתה
Jer 48:2 ב אין עוד תהלת מואב--בחשבון חשבו עליה רעה לכו ונכריתנה מגוי גם מדמן תדמי אחריך תלך חרב
Jer 48:3 ג קול צעקה מחרונים--שד ושבר גדול
Jer 48:4 ד נשברה מואב השמיעו זעקה צעוריה (צעיריה)
Jer 48:5 ה כי מעלה הלחות (הלחית) בבכי יעלה בכי  כי במורד חורנים צרי צעקת שבר שמעו
Jer 48:6 ו נסו מלטו נפשכם ותהיינה כערוער במדבר
Jer 48:7 ז כי יען בטחך במעשיך ובאוצרותיך גם את תלכדי ויצא כמיש (כמוש) בגולה כהניו ושריו יחד (יחדו)
Jer 48:8 ח ויבא שדד אל כל עיר ועיר לא תמלט ואבד העמק ונשמד המישר--אשר אמר יהוה
Jer 48:9 ט תנו ציץ למואב כי נצא תצא ועריה לשמה תהיינה מאין יושב בהן
Jer 48:10 י ארור עשה מלאכת יהוה--רמיה וארור מנע חרבו מדם
Jer 48:11 יא שאנן מואב מנעוריו ושקט הוא אל שמריו ולא הורק מכלי אל כלי ובגולה לא הלך על כן עמד טעמו בו וריחו לא נמר  {ס}
Jer 48:12 יב לכן הנה ימים באים נאם יהוה ושלחתי לו צעים וצעהו וכליו יריקו ונבליהם ינפצו
Jer 48:13 יג ובש מואב מכמוש כאשר בשו בית ישראל מבית אל מבטחם
Jer 48:14 יד איך תאמרו גבורים אנחנו ואנשי חיל למלחמה
Jer 48:15 טו שדד מואב ועריה עלה ומבחר בחוריו ירדו לטבח  נאם המלך--יהוה צבאות שמו
Jer 48:16 טז קרוב איד מואב לבוא ורעתו מהרה מאד
Jer 48:17 יז נדו לו כל סביביו וכל ידעי שמו אמרו איכה נשבר מטה עז--מקל תפארה
Jer 48:18 יח רדי מכבוד ישבי (ושבי) בצמא ישבת בת דיבון  כי שדד מואב עלה בך שחת מבצריך
Jer 48:19 יט אל דרך עמדי וצפי יושבת ערוער שאלי נס ונמלטה אמרי מה נהיתה
Jer 48:20 כ הביש מואב כי חתה הילילי (הילילו) וזעקי (וזעקו) הגידו בארנון כי שדד מואב
Jer 48:21 כא ומשפט בא אל ארץ המישר--אל חלון ואל יהצה ועל מופעת (מיפעת)
Jer 48:22 כב ועל דיבון ועל נבו ועל בית דבלתים
Jer 48:23 כג ועל קריתים ועל בית גמול ועל בית מעון
Jer 48:24 כד ועל קריות ועל בצרה ועל כל ערי ארץ מואב--הרחקות והקרבות
Jer 48:25 כה נגדעה קרן מואב וזרעו נשברה--נאם יהוה
Jer 48:26 כו השכירהו כי על יהוה הגדיל וספק מואב בקיאו והיה לשחק גם הוא
Jer 48:27 כז ואם לוא השחק היה לך ישראל אם בגנבים נמצאה (נמצא)  כי מדי דבריך בו תתנודד
Jer 48:28 כח עזבו ערים ושכנו בסלע ישבי מואב והיו כיונה תקנן בעברי פי פחת
Jer 48:29 כט שמענו גאון מואב גאה מאד  גבהו וגאונו וגאותו ורם לבו
Jer 48:30 ל אני ידעתי נאם יהוה עברתו ולא כן בדיו לא כן עשו
Jer 48:31 לא על כן על מואב איליל ולמואב כלה אזעק  אל אנשי קיר חרש יהגה
Jer 48:32 לב מבכי יעזר אבכה לך הגפן שבמה נטישתיך עברו ים עד ים יעזר נגעו--על קיצך ועל בצירך שדד נפל
Jer 48:33 לג ונאספה שמחה וגיל מכרמל ומארץ מואב ויין מיקבים השבתי--לא ידרך הידד הידד לא הידד
Jer 48:34 לד מזעקת חשבון עד אלעלה עד יהץ נתנו קולם--מצער עד חרנים עגלת שלשיה  כי גם מי נמרים למשמות יהיו
Jer 48:35 לה והשבתי למואב נאם יהוה מעלה במה ומקטיר לאלהיו
Jer 48:36 לו על כן לבי למואב כחללים יהמה ולבי אל אנשי קיר חרש כחלילים יהמה על כן יתרת עשה אבדו
Jer 48:37 לז כי כל ראש קרחה וכל זקן גרעה על כל ידים גדדת ועל מתנים שק
Jer 48:38 לח על כל גגות מואב וברחבתיה כלה מספד  כי שברתי את מואב ככלי אין חפץ בו--נאם יהוה
Jer 48:39 לט איך חתה הילילו איך הפנה ערף מואב בוש והיה מואב לשחק ולמחתה לכל סביביו  {ס}
Jer 48:40 מ כי כה אמר יהוה הנה כנשר ידאה ופרש כנפיו אל מואב
Jer 48:41 מא נלכדה הקריות והמצדות נתפשה והיה לב גבורי מואב ביום ההוא כלב אשה מצרה
Jer 48:42 מב ונשמד מואב מעם  כי על יהוה הגדיל
Jer 48:43 מג פחד ופחת ופח--עליך יושב מואב נאם יהוה
Jer 48:44 מד הניס (הנס) מפני הפחד יפל אל הפחת והעלה מן הפחת ילכד בפח  כי אביא אליה אל מואב שנת פקדתם נאם יהוה
Jer 48:45 מה בצל חשבון עמדו מכח נסים  כי אש יצא מחשבון ולהבה מבין סיחון ותאכל פאת מואב וקדקד בני שאון
Jer 48:46 מו אוי לך מואב אבד עם כמוש  כי לקחו בניך בשבי ובנתיך בשביה
Jer 48:47 מז ושבתי שבות מואב באחרית הימים נאם יהוה עד הנה משפט מואב  {ס}