Isa 42:1 א הן עבדי אתמך בו בחירי רצתה נפשי נתתי רוחי עליו משפט לגוים יוציא
Isa 42:2 ב לא יצעק ולא ישא ולא ישמיע בחוץ קולו
Isa 42:3 ג קנה רצוץ לא ישבור ופשתה כהה לא יכבנה לאמת יוציא משפט
Isa 42:4 ד לא יכהה ולא ירוץ עד ישים בארץ משפט ולתורתו איים ייחלו  {פ}
Isa 42:5 ה כה אמר האל יהוה בורא השמים ונוטיהם רקע הארץ וצאצאיה נתן נשמה לעם עליה ורוח להלכים בה
Isa 42:6 ו אני יהוה קראתיך בצדק ואחזק בידך ואצרך ואתנך לברית עם--לאור גוים
Isa 42:7 ז לפקח עינים עורות להוציא ממסגר אסיר מבית כלא ישבי חשך
Isa 42:8 ח אני יהוה הוא שמי וכבודי לאחר לא אתן ותהלתי לפסילים
Isa 42:9 ט הראשנות הנה באו וחדשות אני מגיד בטרם תצמחנה אשמיע אתכם  {פ}
Isa 42:10 י שירו ליהוה שיר חדש תהלתו מקצה הארץ יורדי הים ומלאו איים וישביהם
Isa 42:11 יא ישאו מדבר ועריו חצרים תשב קדר ירנו ישבי סלע מראש הרים יצוחו
Isa 42:12 יב ישימו ליהוה כבוד ותהלתו באיים יגידו
Isa 42:13 יג יהוה כגבור יצא כאיש מלחמות יעיר קנאה יריע אף יצריח--על איביו יתגבר  {ס}
Isa 42:14 יד החשיתי מעולם--אחריש אתאפק כיולדה אפעה אשם ואשאף יחד
Isa 42:15 טו אחריב הרים וגבעות וכל עשבם אוביש ושמתי נהרות לאיים ואגמים אוביש
Isa 42:16 טז והולכתי עורים בדרך לא ידעו--בנתיבות לא ידעו אדריכם אשים מחשך לפניהם לאור ומעקשים למישור--אלה הדברים עשיתם ולא עזבתים
Isa 42:17 יז נסגו אחור יבשו בשת הבטחים בפסל האמרים למסכה אתם אלהינו  {פ}
Isa 42:18 יח החרשים שמעו והעורים הביטו לראות
Isa 42:19 יט מי עור כי אם עבדי וחרש כמלאכי אשלח מי עור כמשלם ועור כעבד יהוה
Isa 42:20 כ ראית (ראות) רבות ולא תשמר פקוח אזנים ולא ישמע
Isa 42:21 כא יהוה חפץ למען צדקו יגדיל תורה ויאדיר
Isa 42:22 כב והוא עם בזוז ושסוי הפח בחורים כלם ובבתי כלאים החבאו היו לבז ואין מציל משסה ואין אמר השב
Isa 42:23 כג מי בכם יאזין זאת יקשב וישמע לאחור
Isa 42:24 כד מי נתן למשוסה (למשסה) יעקב וישראל לבזזים הלוא יהוה  זו חטאנו לו ולא אבו בדרכיו הלוך ולא שמעו בתורתו
Isa 42:25 כה וישפך עליו חמה אפו ועזוז מלחמה ותלהטהו מסביב ולא ידע ותבער בו ולא ישים על לב