Isa 40:1 א נחמו נחמו עמי--יאמר אלהיכם
Isa 40:2 ב דברו על לב ירושלם וקראו אליה--כי מלאה צבאה כי נרצה עונה  כי לקחה מיד יהוה כפלים בכל חטאתיה  {ס}
Isa 40:3 ג קול קורא--במדבר פנו דרך יהוה ישרו בערבה מסלה לאלהינו
Isa 40:4 ד כל גיא ינשא וכל הר וגבעה ישפלו והיה העקב למישור והרכסים לבקעה
Isa 40:5 ה ונגלה כבוד יהוה וראו כל בשר יחדו כי פי יהוה דבר  {פ}
Isa 40:6 ו קול אמר קרא ואמר מה אקרא כל הבשר חציר וכל חסדו כציץ השדה
Isa 40:7 ז יבש חציר נבל ציץ כי רוח יהוה נשבה בו אכן חציר העם
Isa 40:8 ח יבש חציר נבל ציץ ודבר אלהינו יקום לעולם  {ס}
Isa 40:9 ט על הר גבה עלי לך מבשרת ציון הרימי בכח קולך מבשרת ירושלם הרימי אל תיראי אמרי לערי יהודה הנה אלהיכם
Isa 40:10 י הנה אדני יהוה בחזק יבוא וזרעו משלה לו הנה שכרו אתו ופעלתו לפניו
Isa 40:11 יא כרעה עדרו ירעה בזרעו יקבץ טלאים ובחיקו ישא עלות ינהל  {ס}
Isa 40:12 יב מי מדד בשעלו מים ושמים בזרת תכן וכל בשלש עפר הארץ ושקל בפלס הרים וגבעות במאזנים
Isa 40:13 יג מי תכן את רוח יהוה ואיש עצתו יודיענו
Isa 40:14 יד את מי נועץ ויבינהו וילמדהו בארח משפט וילמדהו דעת ודרך תבונות יודיענו
Isa 40:15 טו הן גוים כמר מדלי וכשחק מאזנים נחשבו הן איים כדק יטול
Isa 40:16 טז ולבנון אין די בער וחיתו--אין די עולה  {פ}
Isa 40:17 יז כל הגוים כאין נגדו מאפס ותהו נחשבו לו
Isa 40:18 יח ואל מי תדמיון אל ומה דמות תערכו לו
Isa 40:19 יט הפסל נסך חרש וצרף בזהב ירקענו ורתקות כסף צורף
Isa 40:20 כ המסכן תרומה עץ לא ירקב יבחר חרש חכם יבקש לו להכין פסל לא ימוט  {ס}
Isa 40:21 כא הלוא תדעו הלוא תשמעו הלוא הגד מראש לכם הלוא הבינותם מוסדות הארץ
Isa 40:22 כב הישב על חוג הארץ וישביה כחגבים הנוטה כדק שמים וימתחם כאהל לשבת
Isa 40:23 כג הנותן רוזנים לאין שפטי ארץ כתהו עשה
Isa 40:24 כד אף בל נטעו אף בל זרעו--אף בל שרש בארץ גזעם וגם נשף בהם ויבשו וסערה כקש תשאם  {ס}
Isa 40:25 כה ואל מי תדמיוני ואשוה--יאמר קדוש
Isa 40:26 כו שאו מרום עיניכם וראו מי ברא אלה המוציא במספר צבאם לכלם בשם יקרא מרב אונים ואמיץ כח איש לא נעדר  {ס}
Isa 40:27 כז למה תאמר יעקב ותדבר ישראל  נסתרה דרכי מיהוה ומאלהי משפטי יעבור
Isa 40:28 כח הלוא ידעת אם לא שמעת אלהי עולם יהוה בורא קצות הארץ--לא ייעף ולא ייגע  אין חקר לתבונתו
Isa 40:29 כט נתן ליעף כח ולאין אונים עצמה ירבה
Isa 40:30 ל ויעפו נערים ויגעו ובחורים כשול יכשלו
Isa 40:31 לא וקוי יהוה יחליפו כח יעלו אבר כנשרים ירוצו ולא ייגעו ילכו ולא ייעפו  {ס}