Isa 23:1 א משא צר  הילילו אניות תרשיש כי שדד מבית מבוא מארץ כתים נגלה למו
Isa 23:2 ב דמו ישבי אי סחר צידון עבר ים מלאוך
Isa 23:3 ג ובמים רבים זרע שחר קציר יאור תבואתה ותהי סחר גוים
Isa 23:4 ד בושי צידון--כי אמר ים מעוז הים לאמר  לא חלתי ולא ילדתי ולא גדלתי בחורים--רוממתי בתולות
Isa 23:5 ה כאשר שמע למצרים יחילו כשמע צר
Isa 23:6 ו עברו תרשישה הילילו ישבי אי
Isa 23:7 ז הזאת לכם עליזה מימי קדם קדמתה יבלוה רגליה מרחוק לגור
Isa 23:8 ח מי יעץ זאת על צר המעטירה אשר סחריה שרים כנעניה נכבדי ארץ
Isa 23:9 ט יהוה צבאות יעצה--לחלל גאון כל צבי להקל כל נכבדי ארץ
Isa 23:10 י עברי ארצך כיאר בת תרשיש אין מזח עוד
Isa 23:11 יא ידו נטה על הים הרגיז ממלכות יהוה צוה אל כנען לשמד מעזניה
Isa 23:12 יב ויאמר לא תוסיפי עוד לעלוז המעשקה בתולת בת צידון כתיים (כתים) קומי עברי--גם שם לא ינוח לך
Isa 23:13 יג הן ארץ כשדים זה העם לא היה--אשור יסדה לציים הקימו בחיניו (בחוניו) עוררו ארמנותיה--שמה למפלה
Isa 23:14 יד הילילו אניות תרשיש  כי שדד מעזכן  {ס}
Isa 23:15 טו והיה ביום ההוא ונשכחת צר שבעים שנה כימי מלך אחד מקץ שבעים שנה יהיה לצר כשירת הזונה
Isa 23:16 טז קחי כנור סבי עיר זונה נשכחה היטיבי נגן הרבי שיר למען תזכרי
Isa 23:17 יז והיה מקץ שבעים שנה יפקד יהוה את צר ושבה לאתננה וזנתה את כל ממלכות הארץ על פני האדמה
Isa 23:18 יח והיה סחרה ואתננה קדש ליהוה--לא יאצר ולא יחסן  כי לישבים לפני יהוה יהיה סחרה לאכל לשבעה ולמכסה עתיק  {פ}