Isa 22:1 א משא גיא חזיון  מה לך אפוא כי עלית כלך לגגות
Isa 22:2 ב תשאות מלאה עיר הומיה--קריה עליזה חלליך לא חללי חרב ולא מתי מלחמה
Isa 22:3 ג כל קציניך נדדו יחד מקשת אסרו כל נמצאיך אסרו יחדו מרחוק ברחו
Isa 22:4 ד על כן אמרתי שעו מני אמרר בבכי אל תאיצו לנחמני על שד בת עמי
Isa 22:5 ה כי יום מהומה ומבוסה ומבוכה לאדני יהוה צבאות--בגי חזיון מקרקר קר ושוע אל ההר
Isa 22:6 ו ועילם נשא אשפה ברכב אדם פרשים וקיר ערה מגן
Isa 22:7 ז ויהי מבחר עמקיך מלאו רכב והפרשים שת שתו השערה
Isa 22:8 ח ויגל את מסך יהודה ותבט ביום ההוא אל נשק בית היער
Isa 22:9 ט ואת בקיעי עיר דוד ראיתם כי רבו ותקבצו את מי הברכה התחתונה
Isa 22:10 י ואת בתי ירושלם ספרתם ותתצו הבתים לבצר החומה
Isa 22:11 יא ומקוה עשיתם בין החמתים למי הברכה הישנה ולא הבטתם אל עשיה ויצרה מרחוק לא ראיתם
Isa 22:12 יב ויקרא אדני יהוה צבאות--ביום ההוא  לבכי ולמספד ולקרחה ולחגר שק
Isa 22:13 יג והנה ששון ושמחה הרג בקר ושחט צאן אכל בשר ושתות יין אכול ושתו כי מחר נמות
Isa 22:14 יד ונגלה באזני יהוה צבאות  אם יכפר העון הזה לכם עד תמתון אמר אדני יהוה צבאות  {פ}
Isa 22:15 טו כה אמר אדני יהוה צבאות  לך בא אל הסכן הזה על שבנא אשר על הבית
Isa 22:16 טז מה לך פה ומי לך פה כי חצבת לך פה קבר חצבי מרום קברו חקקי בסלע משכן לו
Isa 22:17 יז הנה יהוה מטלטלך טלטלה גבר ועטך עטה
Isa 22:18 יח צנוף יצנפך צנפה כדור אל ארץ רחבת ידים שמה תמות ושמה מרכבות כבודך--קלון בית אדניך
Isa 22:19 יט והדפתיך ממצבך וממעמדך יהרסך
Isa 22:20 כ והיה ביום ההוא וקראתי לעבדי לאליקים בן חלקיהו
Isa 22:21 כא והלבשתיו כתנתך ואבנטך אחזקנו וממשלתך אתן בידו והיה לאב ליושב ירושלם ולבית יהודה
Isa 22:22 כב ונתתי מפתח בית דוד על שכמו ופתח ואין סגר וסגר ואין פתח
Isa 22:23 כג ותקעתיו יתד במקום נאמן והיה לכסא כבוד לבית אביו
Isa 22:24 כד ותלו עליו כל כבוד בית אביו הצאצאים והצפעות כל כלי הקטן--מכלי האגנות ועד כל כלי הנבלים
Isa 22:25 כה ביום ההוא נאם יהוה צבאות תמוש היתד התקועה במקום נאמן ונגדעה ונפלה ונכרת המשא אשר עליה--כי יהוה דבר  {פ}