Pro 23:1 א  כי-תשב ללחום את-מושל--    בין תבין את-אשר לפניך
Pro 23:2 ב  ושמת שכין בלעך--    אם-בעל נפש אתה
Pro 23:3 ג  אל-תתאו למטעמותיו    והוא לחם כזבים
Pro 23:4 ד  אל-תיגע להעשיר    מבינתך חדל
Pro 23:5 ה  התעוף (התעיף) עיניך בו    ואיננו כי עשה יעשה-לו כנפים    כנשר ועיף (יעוף) השמים
Pro 23:6 ו  אל-תלחם--את-לחם רע עין    ואל-תתאו למטעמתיו
Pro 23:7 ז  כי כמו שער בנפשו--    כן-הוא אכול ושתה יאמר לך    ולבו בל-עמך
Pro 23:8 ח  פתך-אכלת תקיאנה    ושחת דבריך הנעימים
Pro 23:9 ט  באזני כסיל אל-תדבר    כי-יבוז לשכל מליך
Pro 23:10 י  אל-תסג גבול עולם    ובשדי יתומים אל-תבא
Pro 23:11 יא  כי-גאלם חזק    הוא-יריב את-ריבם אתך
Pro 23:12 יב  הביאה למוסר לבך    ואזנך לאמרי-דעת
Pro 23:13 יג  אל-תמנע מנער מוסר    כי-תכנו בשבט לא ימות
Pro 23:14 יד  אתה בשבט תכנו    ונפשו משאול תציל
Pro 23:15 טו  בני אם-חכם לבך--    ישמח לבי גם-אני
Pro 23:16 טז  ותעלזנה כליותי--    בדבר שפתיך מישרים
Pro 23:17 יז  אל-יקנא לבך בחטאים    כי אם-ביראת-יהוה כל-היום
Pro 23:18 יח  כי אם-יש אחרית    ותקותך לא תכרת
Pro 23:19 יט  שמע-אתה בני וחכם    ואשר בדרך לבך
Pro 23:20 כ  אל-תהי בסבאי-יין--    בזללי בשר למו
Pro 23:21 כא  כי-סבא וזולל יורש    וקרעים תלביש נומה
Pro 23:22 כב  שמע לאביך זה ילדך    ואל-תבוז כי-זקנה אמך
Pro 23:23 כג  אמת קנה ואל-תמכר    חכמה ומוסר ובינה
Pro 23:24 כד  גול (גיל) יגיל אבי צדיק    יולד (ויולד) חכם וישמח- (ישמח-) בו
Pro 23:25 כה  ישמח-אביך ואמך    ותגל יולדתך
Pro 23:26 כו  תנה-בני לבך לי    ועיניך דרכי תרצנה (תצרנה)
Pro 23:27 כז  כי-שוחה עמקה זונה    ובאר צרה נכריה
Pro 23:28 כח  אף-היא כחתף תארב    ובוגדים באדם תוסף
Pro 23:29 כט  למי אוי למי אבוי למי מדונים (מדינים) למי שיח--    למי פצעים חנם למי    חכללות עינים
Pro 23:30 ל  למאחרים על-היין--    לבאים לחקר ממסך
Pro 23:31 לא  אל-תרא יין כי יתאדם    כי-יתן בכיס (בכוס) עינו יתהלך במישרים
Pro 23:32 לב  אחריתו כנחש ישך    וכצפעני יפרש
Pro 23:33 לג  עיניך יראו זרות    ולבך ידבר תהפכות
Pro 23:34 לד  והיית כשכב בלב-ים    וכשכב בראש חבל
Pro 23:35 לה  הכוני בל-חליתי--    הלמוני בל-ידעתי מתי אקיץ    אוסיף אבקשנו עוד