Pro 1:1 א  משלי שלמה בן-דוד--    מלך ישראל
Pro 1:2 ב  לדעת חכמה ומוסר    להבין אמרי בינה
Pro 1:3 ג  לקחת מוסר השכל    צדק ומשפט ומשרים
Pro 1:4 ד  לתת לפתאים ערמה    לנער דעת ומזמה
Pro 1:5 ה  ישמע חכם ויוסף לקח    ונבון תחבלות יקנה
Pro 1:6 ו  להבין משל ומליצה    דברי חכמים וחידתם
Pro 1:7 ז  יראת יהוה ראשית דעת    חכמה ומוסר אוילים בזו
Pro 1:8 ח  שמע בני מוסר אביך    ואל-תטש תורת אמך
Pro 1:9 ט  כי לוית חן הם לראשך    וענקים לגרגרתך
Pro 1:10 י  בני--    אם-יפתוך חטאים אל-תבא
Pro 1:11 יא  אם-יאמרו    לכה אתנו נארבה לדם    נצפנה לנקי חנם
Pro 1:12 יב  נבלעם כשאול חיים    ותמימים כיורדי בור
Pro 1:13 יג  כל-הון יקר נמצא    נמלא בתינו שלל
Pro 1:14 יד  גורלך תפיל בתוכנו    כיס אחד יהיה לכלנו
Pro 1:15 טו  בני--אל-תלך בדרך אתם    מנע רגלך מנתיבתם
Pro 1:16 טז  כי רגליהם לרע ירוצו    וימהרו לשפך-דם
Pro 1:17 יז  כי-חנם מזרה הרשת--    בעיני כל-בעל כנף
Pro 1:18 יח  והם לדמם יארבו    יצפנו לנפשתם
Pro 1:19 יט  כן--ארחות כל-בצע בצע    את-נפש בעליו יקח
Pro 1:20 כ  חכמות בחוץ תרנה    ברחבות תתן קולה
Pro 1:21 כא  בראש המיות תקרא    בפתחי שערים בעיר--אמריה תאמר
Pro 1:22 כב  עד-מתי פתים--    תאהבו-פתי ולצים--לצון חמדו להם    וכסילים ישנאו-דעת
Pro 1:23 כג  תשובו לתוכחתי    הנה אביעה לכם רוחי אודיעה דברי אתכם
Pro 1:24 כד  יען קראתי ותמאנו    נטיתי ידי ואין מקשיב
Pro 1:25 כה  ותפרעו כל-עצתי    ותוכחתי לא אביתם
Pro 1:26 כו  גם-אני באידכם אשחק    אלעג בבא פחדכם
Pro 1:27 כז  בבא כשאוה (כשואה) פחדכם--    ואידכם כסופה יאתה בבא עליכם    צרה וצוקה
Pro 1:28 כח  אז יקראנני ולא אענה    ישחרנני ולא ימצאנני
Pro 1:29 כט  תחת כי-שנאו דעת    ויראת יהוה לא בחרו
Pro 1:30 ל  לא-אבו לעצתי    נאצו כל-תוכחתי
Pro 1:31 לא  ויאכלו מפרי דרכם    וממעצתיהם ישבעו
Pro 1:32 לב  כי משובת פתים תהרגם    ושלות כסילים תאבדם
Pro 1:33 לג  ושמע לי ישכן-בטח    ושאנן מפחד רעה