Psa 146:1 א  הללו-יה הללי נפשי    את-יהוה
Psa 146:2 ב  אהללה יהוה בחיי    אזמרה לאלהי בעודי
Psa 146:3 ג  אל-תבטחו בנדיבים--    בבן-אדם שאין לו תשועה
Psa 146:4 ד  תצא רוחו ישב לאדמתו    ביום ההוא אבדו עשתנתיו
Psa 146:5 ה  אשרי--שאל יעקב בעזרו    שברו על-יהוה אלהיו
Psa 146:6 ו  עשה שמים וארץ--    את-הים ואת-כל-אשר-בם השמר אמת    לעולם
Psa 146:7 ז  עשה משפט לעשוקים--נתן לחם לרעבים    יהוה מתיר אסורים
Psa 146:8 ח  יהוה פקח עורים--יהוה זקף כפופים    יהוה אהב צדיקים
Psa 146:9 ט  יהוה שמר את-גרים--יתום ואלמנה יעודד    ודרך רשעים יעות
Psa 146:10 י  ימלך יהוה לעולם--    אלהיך ציון לדר ודר הללו-יה