Psa 140:1 א  למנצח מזמור לדוד
Psa 140:2 ב  חלצני יהוה מאדם רע    מאיש חמסים תנצרני
Psa 140:3 ג  אשר חשבו רעות בלב    כל-יום יגורו מלחמות
Psa 140:4 ד  שננו לשונם כמו-נחש    חמת עכשוב--תחת שפתימו סלה
Psa 140:5 ה  שמרני יהוה מידי רשע--    מאיש חמסים תנצרני אשר חשבו    לדחות פעמי
Psa 140:6 ו  טמנו גאים פח לי--    וחבלים פרשו רשת ליד-מעגל מקשים שתו-לי    סלה
Psa 140:7 ז  אמרתי ליהוה אלי אתה    האזינה יהוה קול תחנוני
Psa 140:8 ח  יהוה אדני עז ישועתי    סכתה לראשי ביום נשק
Psa 140:9 ט  אל-תתן יהוה מאויי רשע    זממו אל-תפק ירומו סלה
Psa 140:10 י  ראש מסבי--    עמל שפתימו יכסומו (יכסימו)
Psa 140:11 יא  ימיטו (ימוטו) עליהם גחלים    באש יפלם במהמרות בל-יקומו
Psa 140:12 יב  איש לשון בל-יכון בארץ    איש-חמס רע--יצודנו למדחפת
Psa 140:13 יג  ידעת (ידעתי)--כי-יעשה יהוה דין עני    משפט אבינים [ (Psalms 140:14) יד  אך צדיקים יודו לשמך    ישבו ישרים את-פניך ]