Psa 109:1 א  למנצח לדוד מזמור אלהי תהלתי    אל-תחרש
Psa 109:2 ב  כי פי רשע ופי-מרמה--עלי פתחו    דברו אתי לשון שקר
Psa 109:3 ג  ודברי שנאה סבבוני    וילחמוני חנם
Psa 109:4 ד  תחת-אהבתי ישטנוני    ואני תפלה
Psa 109:5 ה  וישימו עלי רעה תחת טובה    ושנאה תחת אהבתי
Psa 109:6 ו  הפקד עליו רשע    ושטן יעמד על-ימינו
Psa 109:7 ז  בהשפטו יצא רשע    ותפלתו תהיה לחטאה
Psa 109:8 ח  יהיו-ימיו מעטים    פקדתו יקח אחר
Psa 109:9 ט  יהיו-בניו יתומים    ואשתו אלמנה
Psa 109:10 י  ונוע ינועו בניו ושאלו    ודרשו מחרבותיהם
Psa 109:11 יא  ינקש נושה לכל-אשר-לו    ויבזו זרים יגיעו
Psa 109:12 יב  אל-יהי-לו משך חסד    ואל-יהי חונן ליתומיו
Psa 109:13 יג  יהי-אחריתו להכרית    בדור אחר ימח שמם
Psa 109:14 יד  יזכר עון אבתיו--אל-יהוה    וחטאת אמו אל-תמח
Psa 109:15 טו  יהיו נגד-יהוה תמיד    ויכרת מארץ זכרם
Psa 109:16 טז  יען--    אשר לא זכר עשות חסד וירדף איש-עני ואביון--ונכאה לבב    למותת
Psa 109:17 יז  ויאהב קללה ותבואהו    ולא-חפץ בברכה ותרחק ממנו
Psa 109:18 יח  וילבש קללה כמדו    ותבא כמים בקרבו וכשמן בעצמותיו
Psa 109:19 יט  תהי-לו כבגד יעטה    ולמזח תמיד יחגרה
Psa 109:20 כ  זאת פעלת שטני מאת יהוה    והדברים רע על-נפשי
Psa 109:21 כא  ואתה יהוה אדני--    עשה-אתי למען שמך כי-טוב חסדך    הצילני
Psa 109:22 כב  כי-עני ואביון אנכי    ולבי חלל בקרבי
Psa 109:23 כג  כצל-כנטותו נהלכתי    ננערתי כארבה
Psa 109:24 כד  ברכי כשלו מצום    ובשרי כחש משמן
Psa 109:25 כה  ואני הייתי חרפה להם    יראוני יניעון ראשם
Psa 109:26 כו  עזרני יהוה אלהי    הושיעני כחסדך
Psa 109:27 כז  וידעו כי-ידך זאת    אתה יהוה עשיתה
Psa 109:28 כח  יקללו-המה ואתה תברך    קמו ויבשו--ועבדך ישמח
Psa 109:29 כט  ילבשו שוטני כלמה    ויעטו כמעיל בשתם
Psa 109:30 ל  אודה יהוה מאד בפי    ובתוך רבים אהללנו
Psa 109:31 לא  כי-יעמד לימין אביון--    להושיע משפטי נפשו