Psa 97:1 א  יהוה מלך תגל הארץ    ישמחו איים רבים
Psa 97:2 ב  ענן וערפל סביביו    צדק ומשפט מכון כסאו
Psa 97:3 ג  אש לפניו תלך    ותלהט סביב צריו
Psa 97:4 ד  האירו ברקיו תבל    ראתה ותחל הארץ
Psa 97:5 ה  הרים--כדונג נמסו מלפני יהוה    מלפני אדון כל-הארץ
Psa 97:6 ו  הגידו השמים צדקו    וראו כל-העמים כבודו
Psa 97:7 ז  יבשו כל-עבדי פסל--    המתהללים באלילים השתחוו-לו    כל-אלהים
Psa 97:8 ח  שמעה ותשמח ציון    ותגלנה בנות יהודה-- למען משפטיך    יהוה
Psa 97:9 ט  כי-אתה יהוה    עליון על-כל-הארץ מאד נעלית    על-כל-אלהים
Psa 97:10 י  אהבי יהוה    שנאו-רע שמר נפשות חסידיו    מיד רשעים יצילם
Psa 97:11 יא  אור זרע לצדיק    ולישרי-לב שמחה
Psa 97:12 יב  שמחו צדיקים ביהוה    והודו לזכר קדשו