Psa 88:1 א  שיר מזמור לבני-קרח למנצח על-מחלת לענות    משכיל להימן האזרחי
Psa 88:2 ב  יהוה אלהי ישועתי--    יום-צעקתי בלילה נגדך
Psa 88:3 ג  תבוא לפניך תפלתי    הטה אזנך לרנתי
Psa 88:4 ד  כי-שבעה ברעות נפשי    וחיי לשאול הגיעו
Psa 88:5 ה  נחשבתי עם-יורדי בור    הייתי כגבר אין-איל
Psa 88:6 ו  במתים    חפשי כמו חללים שכבי קבר--    אשר לא זכרתם עוד והמה    מידך נגזרו
Psa 88:7 ז  שתני בבור תחתיות    במחשכים במצלות
Psa 88:8 ח  עלי סמכה חמתך    וכל-משבריך ענית סלה
Psa 88:9 ט  הרחקת מידעי ממני    שתני תועבות למו כלא ולא אצא
Psa 88:10 י  עיני דאבה    מני-עני קראתיך יהוה בכל-יום    שטחתי אליך כפי
Psa 88:11 יא  הלמתים תעשה-פלא    אם-רפאים יקומו יודוך סלה
Psa 88:12 יב  היספר בקבר חסדך    אמונתך באבדון
Psa 88:13 יג  היודע בחשך פלאך    וצדקתך בארץ נשיה
Psa 88:14 יד  ואני אליך יהוה שועתי    ובבקר תפלתי תקדמך
Psa 88:15 טו  למה יהוה תזנח נפשי    תסתיר פניך ממני
Psa 88:16 טז  עני אני וגוע מנער    נשאתי אמיך אפונה
Psa 88:17 יז  עלי עברו חרוניך    בעותיך צמתותני
Psa 88:18 יח  סבוני כמים כל-היום    הקיפו עלי יחד [ (Psalms 88:19) יט  הרחקת ממני אהב ורע    מידעי מחשך ]