Psa 75:1 א  למנצח אל-תשחת מזמור לאסף שיר
Psa 75:2 ב  הודינו לך אלהים--הודינו וקרוב שמך    ספרו נפלאותיך
Psa 75:3 ג  כי אקח מועד    אני מישרים אשפט
Psa 75:4 ד  נמגים ארץ וכל-ישביה    אנכי תכנתי עמודיה סלה
Psa 75:5 ה  אמרתי להוללים אל-תהלו    ולרשעים אל-תרימו קרן
Psa 75:6 ו  אל-תרימו למרום קרנכם    תדברו בצואר עתק
Psa 75:7 ז  כי לא ממוצא וממערב    ולא ממדבר הרים
Psa 75:8 ח  כי-אלהים שפט    זה ישפיל וזה ירים
Psa 75:9 ט  כי כוס ביד-יהוה ויין חמר מלא מסך--    ויגר מזה אך-שמריה ימצו ישתו    כל רשעי-ארץ
Psa 75:10 י  ואני אגיד לעלם    אזמרה לאלהי יעקב [ (Psalms 75:11) יא  וכל-קרני רשעים אגדע    תרוממנה קרנות צדיק ]