Psa 22:1 א  למנצח על-אילת השחר    מזמור לדוד
Psa 22:2 ב  אלי אלי למה עזבתני    רחוק מישועתי דברי שאגתי
Psa 22:3 ג  אלהי--אקרא יומם ולא תענה    ולילה ולא-דמיה לי
Psa 22:4 ד  ואתה קדוש--    יושב תהלות ישראל
Psa 22:5 ה  בך בטחו אבתינו    בטחו ותפלטמו
Psa 22:6 ו  אליך זעקו ונמלטו    בך בטחו ולא-בושו
Psa 22:7 ז  ואנכי תולעת ולא-איש    חרפת אדם ובזוי עם
Psa 22:8 ח  כל-ראי ילעגו לי    יפטירו בשפה יניעו ראש
Psa 22:9 ט  גל אל-יהוה יפלטהו    יצילהו כי חפץ בו
Psa 22:10 י  כי-אתה גחי מבטן    מבטיחי על-שדי אמי
Psa 22:11 יא  עליך השלכתי מרחם    מבטן אמי אלי אתה
Psa 22:12 יב  אל-תרחק ממני כי-צרה קרובה    כי-אין עוזר
Psa 22:13 יג  סבבוני פרים רבים    אבירי בשן כתרוני
Psa 22:14 יד  פצו עלי פיהם    אריה טרף ושאג
Psa 22:15 טו  כמים נשפכתי--    והתפרדו כל-עצמותי היה לבי כדונג    נמס בתוך מעי
Psa 22:16 טז  יבש כחרש כחי ולשוני מדבק מלקוחי    ולעפר-מות תשפתני
Psa 22:17 יז  כי סבבוני כלבים    עדת מרעים הקיפוני כארי ידי ורגלי
Psa 22:18 יח  אספר כל-עצמותי    המה יביטו יראו-בי
Psa 22:19 יט  יחלקו בגדי להם    ועל-לבושי יפילו גורל
Psa 22:20 כ  ואתה יהוה אל-תרחק    אילותי לעזרתי חושה
Psa 22:21 כא  הצילה מחרב נפשי    מיד-כלב יחידתי
Psa 22:22 כב  הושיעני מפי אריה    ומקרני רמים עניתני
Psa 22:23 כג  אספרה שמך לאחי    בתוך קהל אהללך
Psa 22:24 כד  יראי יהוה הללוהו--    כל-זרע יעקב כבדוהו וגורו ממנו    כל-זרע ישראל
Psa 22:25 כה  כי לא-בזה ולא שקץ ענות עני--    ולא-הסתיר פניו ממנו ובשועו אליו    שמע
Psa 22:26 כו  מאתך תהלתי    בקהל רב--נדרי אשלם נגד יראיו
Psa 22:27 כז  יאכלו ענוים וישבעו--    יהללו יהוה דרשיו יחי לבבכם    לעד
Psa 22:28 כח  יזכרו וישבו אל-יהוה--    כל-אפסי-ארץ וישתחוו לפניך    כל-משפחות גוים
Psa 22:29 כט  כי ליהוה המלוכה    ומשל בגוים
Psa 22:30 ל  אכלו וישתחוו כל-דשני-ארץ--    לפניו יכרעו כל-יורדי עפר ונפשו    לא חיה
Psa 22:31 לא  זרע יעבדנו    יספר לאדני לדור [ (Psalms 22:32) לב  יבאו ויגידו צדקתו    לעם נולד כי עשה ]