Job 32:1 א  וישבתו שלשת האנשים האלה--    מענות את-איוב כי הוא צדיק    בעיניו
Job 32:2 ב  ויחר אף אליהוא בן-ברכאל הבוזי--    ממשפחת-רם באיוב חרה אפו--    על-צדקו נפשו מאלהים
Job 32:3 ג  ובשלשת רעיו    חרה אפו על אשר לא-מצאו מענה--    וירשיעו את-איוב
Job 32:4 ד  ואליהו--חכה את-איוב בדברים    כי זקנים-המה ממנו לימים
Job 32:5 ה  וירא אליהוא--כי אין מענה בפי שלשת האנשים    ויחר אפו
Job 32:6 ו  ויען אליהוא בן ברכאל הבוזי--    ויאמר צעיר אני לימים    ואתם ישישים על-כן זחלתי ואירא    מחות דעי אתכם
Job 32:7 ז  אמרתי ימים ידברו    ורב שנים ידיעו חכמה
Job 32:8 ח  אכן רוח-היא באנוש    ונשמת שדי תבינם
Job 32:9 ט  לא-רבים יחכמו    וזקנים יבינו משפט
Job 32:10 י  לכן אמרתי שמעה-לי    אחוה דעי אף-אני
Job 32:11 יא  הן הוחלתי לדבריכם--אזין עד-תבונתיכם    עד-תחקרון מלין
Job 32:12 יב  ועדיכם אתבונן    והנה אין לאיוב מוכיח--עונה אמריו מכם
Job 32:13 יג  פן-תאמרו מצאנו חכמה    אל ידפנו לא-איש
Job 32:14 יד  ולא-ערך אלי מלין    ובאמריכם לא אשיבנו
Job 32:15 טו  חתו לא-ענו עוד    העתיקו מהם מלים
Job 32:16 טז  והוחלתי כי-לא ידברו    כי עמדו לא-ענו עוד
Job 32:17 יז  אענה אף-אני חלקי    אחוה דעי אף-אני
Job 32:18 יח  כי מלתי מלים    הציקתני רוח בטני
Job 32:19 יט  הנה-בטני--כיין לא-יפתח    כאבות חדשים יבקע
Job 32:20 כ  אדברה וירוח-לי    אפתח שפתי ואענה
Job 32:21 כא  אל-נא אשא פני-איש    ואל-אדם לא אכנה
Job 32:22 כב  כי לא ידעתי אכנה    כמעט ישאני עשני