Job 22:1 א                  ויען אליפז התמני ויאמר
Job 22:2 ב  הלאל יסכן-גבר--    כי-יסכן עלימו משכיל
Job 22:3 ג  החפץ לשדי כי תצדק    ואם-בצע כי-תתם דרכיך
Job 22:4 ד  המיראתך יכיחך    יבוא עמך במשפט
Job 22:5 ה  הלא רעתך רבה    ואין-קץ לעונתיך
Job 22:6 ו  כי-תחבל אחיך חנם    ובגדי ערומים תפשיט
Job 22:7 ז  לא-מים עיף תשקה    ומרעב תמנע-לחם
Job 22:8 ח  ואיש זרוע לו הארץ    ונשוא פנים ישב בה
Job 22:9 ט  אלמנות שלחת ריקם    וזרעות יתמים ידכא
Job 22:10 י  על-כן סביבותיך פחים    ויבהלך פחד פתאם
Job 22:11 יא  או-חשך לא-תראה    ושפעת-מים תכסך
Job 22:12 יב  הלא-אלוה גבה שמים    וראה ראש כוכבים כי-רמו
Job 22:13 יג  ואמרת מה-ידע אל    הבעד ערפל ישפוט
Job 22:14 יד  עבים סתר-לו ולא יראה    וחוג שמים יתהלך
Job 22:15 טו  הארח עולם תשמור--    אשר דרכו מתי-און
Job 22:16 טז  אשר-קמטו ולא-עת    נהר יוצק יסודם
Job 22:17 יז  האמרים לאל סור ממנו    ומה-יפעל שדי למו
Job 22:18 יח  והוא מלא בתיהם טוב    ועצת רשעים רחקה מני
Job 22:19 יט  יראו צדיקים וישמחו    ונקי ילעג-למו
Job 22:20 כ  אם-לא נכחד קימנו    ויתרם אכלה אש
Job 22:21 כא  הסכן-נא עמו ושלם    בהם תבואתך טובה
Job 22:22 כב  קח-נא מפיו תורה    ושים אמריו בלבבך
Job 22:23 כג  אם-תשוב עד-שדי תבנה    תרחיק עולה מאהלך
Job 22:24 כד  ושית-על-עפר בצר    ובצור נחלים אופיר
Job 22:25 כה  והיה שדי בצריך    וכסף תועפות לך
Job 22:26 כו  כי-אז על-שדי תתענג    ותשא אל-אלוה פניך
Job 22:27 כז  תעתיר אליו וישמעך    ונדריך תשלם
Job 22:28 כח  ותגזר-אמר ויקם לך    ועל-דרכיך נגה אור
Job 22:29 כט  כי-השפילו ותאמר גוה    ושח עינים יושע
Job 22:30 ל  ימלט אי-נקי    ונמלט בבר כפיך