Job 15:1 א                  ויען אליפז התימני ויאמר
Job 15:2 ב  החכם יענה דעת-רוח    וימלא קדים בטנו
Job 15:3 ג  הוכח בדבר לא-יסכון    ומלים לא-יועיל בם
Job 15:4 ד  אף-אתה תפר יראה    ותגרע שיחה לפני-אל
Job 15:5 ה  כי יאלף עונך פיך    ותבחר לשון ערומים
Job 15:6 ו  ירשיעך פיך ולא-אני    ושפתיך יענו-בך
Job 15:7 ז  הראישון אדם תולד    ולפני גבעות חוללת
Job 15:8 ח  הבסוד אלוה תשמע    ותגרע אליך חכמה
Job 15:9 ט  מה-ידעת ולא נדע    תבין ולא-עמנו הוא
Job 15:10 י  גם-שב גם-ישיש בנו--    כביר מאביך ימים
Job 15:11 יא  המעט ממך תנחומות אל    ודבר לאט עמך
Job 15:12 יב  מה-יקחך לבך    ומה-ירזמון עיניך
Job 15:13 יג  כי-תשיב אל-אל רוחך    והצאת מפיך מלין
Job 15:14 יד  מה-אנוש כי-יזכה    וכי-יצדק ילוד אשה
Job 15:15 טו  הן בקדשו לא יאמין    ושמים לא-זכו בעיניו
Job 15:16 טז  אף כי-נתעב ונאלח    איש-שתה כמים עולה
Job 15:17 יז  אחוך שמע-לי    וזה-חזיתי ואספרה
Job 15:18 יח  אשר-חכמים יגידו    ולא כחדו מאבותם
Job 15:19 יט  להם לבדם נתנה הארץ    ולא-עבר זר בתוכם
Job 15:20 כ  כל-ימי רשע הוא מתחולל    ומספר שנים נצפנו לעריץ
Job 15:21 כא  קול-פחדים באזניו    בשלום שודד יבואנו
Job 15:22 כב  לא-יאמין שוב מני-חשך    וצפו (וצפוי) הוא אלי-חרב
Job 15:23 כג  נדד הוא ללחם איה    ידע כי-נכון בידו יום-חשך
Job 15:24 כד  יבעתהו צר ומצוקה    תתקפהו כמלך עתיד לכידור
Job 15:25 כה  כי-נטה אל-אל ידו    ואל-שדי יתגבר
Job 15:26 כו  ירוץ אליו בצואר    בעבי גבי מגניו
Job 15:27 כז  כי-כסה פניו בחלבו    ויעש פימה עלי-כסל
Job 15:28 כח  וישכון ערים נכחדות--בתים לא-ישבו למו    אשר התעתדו לגלים
Job 15:29 כט  לא-יעשר ולא-יקום חילו    ולא-יטה לארץ מנלם
Job 15:30 ל  לא-יסור מני-חשך--ינקתו תיבש שלהבת    ויסור ברוח פיו
Job 15:31 לא  אל-יאמן בשו נתעה    כי-שוא תהיה תמורתו
Job 15:32 לב  בלא-יומו תמלא    וכפתו לא רעננה
Job 15:33 לג  יחמס כגפן בסרו    וישלך כזית נצתו
Job 15:34 לד  כי-עדת חנף גלמוד    ואש אכלה אהלי-שחד
Job 15:35 לה  הרה עמל וילד און    ובטנם תכין מרמה