2Sm 1:1 א ויהי אחרי מות שאול ודוד שב מהכות את העמלק וישב דוד בצקלג ימים שנים
2Sm 1:2 ב ויהי ביום השלישי והנה איש בא מן המחנה מעם שאול ובגדיו קרעים ואדמה על ראשו ויהי בבאו אל דוד ויפל ארצה וישתחו
2Sm 1:3 ג ויאמר לו דוד אי מזה תבוא ויאמר אליו ממחנה ישראל נמלטתי
2Sm 1:4 ד ויאמר אליו דוד מה היה הדבר הגד נא לי ויאמר אשר נס העם מן המלחמה וגם הרבה נפל מן העם וימתו וגם שאול ויהונתן בנו מתו
2Sm 1:5 ה ויאמר דוד אל הנער המגיד לו  איך ידעת כי מת שאול ויהונתן בנו
2Sm 1:6 ו ויאמר הנער המגיד לו נקרא נקריתי בהר הגלבע והנה שאול נשען על חניתו והנה הרכב ובעלי הפרשים הדבקהו
2Sm 1:7 ז ויפן אחריו ויראני ויקרא אלי ואמר הנני
2Sm 1:8 ח ויאמר לי מי אתה ויאמר (ואמר) אליו עמלקי אנכי
2Sm 1:9 ט ויאמר אלי עמד נא עלי ומתתני--כי אחזני השבץ  כי כל עוד נפשי בי
2Sm 1:10 י ואעמד עליו ואמתתהו--כי ידעתי כי לא יחיה אחרי נפלו ואקח הנזר אשר על ראשו ואצעדה אשר על זרעו ואביאם אל אדני הנה
2Sm 1:11 יא ויחזק דוד בבגדו ויקרעם וגם כל האנשים אשר אתו
2Sm 1:12 יב ויספדו ויבכו ויצמו עד הערב  על שאול ועל יהונתן בנו ועל עם יהוה ועל בית ישראל--כי נפלו בחרב  {פ}
2Sm 1:13 יג ויאמר דוד אל הנער המגיד לו אי מזה אתה ויאמר בן איש גר עמלקי אנכי
2Sm 1:14 יד ויאמר אליו דוד  איך לא יראת לשלח ידך לשחת את משיח יהוה
2Sm 1:15 טו ויקרא דוד לאחד מהנערים ויאמר גש פגע בו ויכהו וימת
2Sm 1:16 טז ויאמר אליו דוד דמיך (דמך) על ראשך  כי פיך ענה בך לאמר אנכי מתתי את משיח יהוה  {פ}
2Sm 1:17 יז ויקנן דוד את הקינה הזאת על שאול ועל יהונתן בנו
2Sm 1:18 יח ויאמר ללמד בני יהודה קשת הנה כתובה על ספר הישר
2Sm 1:19 יט הצבי ישראל על במותיך חלל  איך נפלו גבורים
2Sm 1:20 כ אל תגידו בגת אל תבשרו בחוצת אשקלון  פן תשמחנה בנות פלשתים פן תעלזנה בנות הערלים
2Sm 1:21 כא הרי בגלבע אל טל ואל מטר עליכם--ושדי תרומת  כי שם נגעל מגן גבורים--מגן שאול בלי משיח בשמן
2Sm 1:22 כב מדם חללים מחלב גבורים--קשת יהונתן לא נשוג אחור וחרב שאול לא תשוב ריקם
2Sm 1:23 כג שאול ויהונתן הנאהבים והנעימם בחייהם ובמותם לא נפרדו מנשרים קלו מאריות גברו
2Sm 1:24 כד בנות ישראל--אל שאול בכינה המלבשכם שני עם עדנים המעלה עדי זהב על לבושכן
2Sm 1:25 כה איך נפלו גברים בתוך המלחמה--יהונתן על במותיך חלל
2Sm 1:26 כו צר לי עליך אחי יהונתן--נעמת לי מאד נפלאתה אהבתך לי מאהבת נשים
2Sm 1:27 כז איך נפלו גבורים ויאבדו כלי מלחמה  {פ}