Exo 35:1 א ויקהל משה את כל עדת בני ישראל--ויאמר אלהם  אלה הדברים אשר צוה יהוה לעשת אתם
Exo 35:2 ב ששת ימים תעשה מלאכה וביום השביעי יהיה לכם קדש שבת שבתון ליהוה כל העשה בו מלאכה יומת
Exo 35:3 ג לא תבערו אש בכל משבתיכם ביום השבת  {פ}
Exo 35:4 ד ויאמר משה אל כל עדת בני ישראל לאמר  זה הדבר אשר צוה יהוה לאמר
Exo 35:5 ה קחו מאתכם תרומה ליהוה כל נדיב לבו יביאה את תרומת יהוה  זהב וכסף ונחשת
Exo 35:6 ו ותכלת וארגמן ותולעת שני ושש ועזים
Exo 35:7 ז וערת אילם מאדמים וערת תחשים ועצי שטים
Exo 35:8 ח ושמן למאור ובשמים לשמן המשחה ולקטרת הסמים
Exo 35:9 ט ואבני שהם--ואבני מלאים  לאפוד ולחשן
Exo 35:10 י וכל חכם לב בכם יבאו ויעשו את כל אשר צוה יהוה
Exo 35:11 יא את המשכן--את אהלו ואת מכסהו את קרסיו ואת קרשיו את בריחו את עמדיו ואת אדניו
Exo 35:12 יב את הארן ואת בדיו את הכפרת ואת פרכת המסך
Exo 35:13 יג את השלחן ואת בדיו ואת כל כליו ואת לחם הפנים
Exo 35:14 יד ואת מנרת המאור ואת כליה ואת נרתיה ואת שמן המאור
Exo 35:15 טו ואת מזבח הקטרת ואת בדיו ואת שמן המשחה ואת קטרת הסמים ואת מסך הפתח לפתח המשכן
Exo 35:16 טז את מזבח העלה ואת מכבר הנחשת אשר לו את בדיו ואת כל כליו את הכיר ואת כנו
Exo 35:17 יז את קלעי החצר את עמדיו ואת אדניה ואת מסך שער החצר
Exo 35:18 יח את יתדת המשכן ואת יתדת החצר ואת מיתריהם
Exo 35:19 יט את בגדי השרד לשרת בקדש  את בגדי הקדש לאהרן הכהן ואת בגדי בניו לכהן
Exo 35:20 כ ויצאו כל עדת בני ישראל מלפני משה
Exo 35:21 כא ויבאו כל איש אשר נשאו לבו וכל אשר נדבה רוחו אתו הביאו את תרומת יהוה למלאכת אהל מועד ולכל עבדתו ולבגדי הקדש
Exo 35:22 כב ויבאו האנשים על הנשים כל נדיב לב הביאו חח ונזם וטבעת וכומז כל כלי זהב וכל איש אשר הניף תנופת זהב ליהוה
Exo 35:23 כג וכל איש אשר נמצא אתו תכלת וארגמן ותולעת שני--ושש ועזים וערת אילם מאדמים וערת תחשים הביאו
Exo 35:24 כד כל מרים תרומת כסף ונחשת הביאו את תרומת יהוה וכל אשר נמצא אתו עצי שטים לכל מלאכת העבדה--הביאו
Exo 35:25 כה וכל אשה חכמת לב בידיה טוו ויביאו מטוה את התכלת ואת הארגמן את תולעת השני ואת השש
Exo 35:26 כו וכל הנשים--אשר נשא לבן אתנה בחכמה  טוו את העזים
Exo 35:27 כז והנשאם הביאו--את אבני השהם ואת אבני המלאים  לאפוד ולחשן
Exo 35:28 כח ואת הבשם ואת השמן  למאור--ולשמן המשחה ולקטרת הסמים
Exo 35:29 כט כל איש ואשה אשר נדב לבם אתם להביא לכל המלאכה אשר צוה יהוה לעשות ביד משה--הביאו בני ישראל נדבה ליהוה  {פ}
Exo 35:30 ל ויאמר משה אל בני ישראל ראו קרא יהוה בשם בצלאל בן אורי בן חור למטה יהודה
Exo 35:31 לא וימלא אתו רוח אלהים בחכמה בתבונה ובדעת ובכל מלאכה
Exo 35:32 לב ולחשב מחשבת--לעשת בזהב ובכסף ובנחשת
Exo 35:33 לג ובחרשת אבן למלאת ובחרשת עץ לעשות בכל מלאכת מחשבת
Exo 35:34 לד ולהורת נתן בלבו  הוא ואהליאב בן אחיסמך למטה דן
Exo 35:35 לה מלא אתם חכמת לב לעשות כל מלאכת חרש וחשב ורקם בתכלת ובארגמן בתולעת השני ובשש וארג עשי כל מלאכה וחשבי מחשבת