Exo 25:1 א וידבר יהוה אל משה לאמר
Exo 25:2 ב דבר אל בני ישראל ויקחו לי תרומה  מאת כל איש אשר ידבנו לבו תקחו את תרומתי
Exo 25:3 ג וזאת התרומה אשר תקחו מאתם  זהב וכסף ונחשת
Exo 25:4 ד ותכלת וארגמן ותולעת שני ושש ועזים
Exo 25:5 ה וערת אילם מאדמים וערת תחשים ועצי שטים
Exo 25:6 ו שמן למאר בשמים לשמן המשחה ולקטרת הסמים
Exo 25:7 ז אבני שהם ואבני מלאים לאפד ולחשן
Exo 25:8 ח ועשו לי מקדש ושכנתי בתוכם
Exo 25:9 ט ככל אשר אני מראה אותך את תבנית המשכן ואת תבנית כל כליו וכן תעשו  {ס}
Exo 25:10 י ועשו ארון עצי שטים  אמתים וחצי ארכו ואמה וחצי רחבו ואמה וחצי קמתו
Exo 25:11 יא וצפית אתו זהב טהור מבית ומחוץ תצפנו ועשית עליו זר זהב סביב
Exo 25:12 יב ויצקת לו ארבע טבעת זהב ונתתה על ארבע פעמתיו ושתי טבעת על צלעו האחת ושתי טבעת על צלעו השנית
Exo 25:13 יג ועשית בדי עצי שטים וצפית אתם זהב
Exo 25:14 יד והבאת את הבדים בטבעת על צלעת הארן לשאת את הארן בהם
Exo 25:15 טו בטבעת הארן יהיו הבדים  לא יסרו ממנו
Exo 25:16 טז ונתת אל הארן--את העדת אשר אתן אליך
Exo 25:17 יז ועשית כפרת זהב טהור  אמתים וחצי ארכה ואמה וחצי רחבה
Exo 25:18 יח ועשית שנים כרבים זהב מקשה תעשה אתם משני קצות הכפרת
Exo 25:19 יט ועשה כרוב אחד מקצה מזה וכרוב אחד מקצה מזה מן הכפרת תעשו את הכרבים על שני קצותיו
Exo 25:20 כ והיו הכרבים פרשי כנפים למעלה סככים בכנפיהם על הכפרת ופניהם איש אל אחיו אל הכפרת--יהיו פני הכרבים
Exo 25:21 כא ונתת את הכפרת על הארן מלמעלה ואל הארן--תתן את העדת אשר אתן אליך
Exo 25:22 כב ונועדתי לך שם ודברתי אתך מעל הכפרת מבין שני הכרבים אשר על ארון העדת--את כל אשר אצוה אותך אל בני ישראל  {פ}
Exo 25:23 כג ועשית שלחן עצי שטים  אמתים ארכו ואמה רחבו ואמה וחצי קמתו
Exo 25:24 כד וצפית אתו זהב טהור ועשית לו זר זהב סביב
Exo 25:25 כה ועשית לו מסגרת טפח סביב ועשית זר זהב למסגרתו סביב
Exo 25:26 כו ועשית לו ארבע טבעת זהב ונתת את הטבעת על ארבע הפאת אשר לארבע רגליו
Exo 25:27 כז לעמת המסגרת תהיין הטבעת--לבתים לבדים לשאת את השלחן
Exo 25:28 כח ועשית את הבדים עצי שטים וצפית אתם זהב ונשא בם את השלחן
Exo 25:29 כט ועשית קערתיו וכפתיו וקשותיו ומנקיתיו אשר יסך בהן זהב טהור תעשה אתם
Exo 25:30 ל ונתת על השלחן לחם פנים לפני תמיד  {פ}
Exo 25:31 לא ועשית מנרת זהב טהור מקשה תעשה המנורה ירכה וקנה גביעיה כפתריה ופרחיה ממנה יהיו
Exo 25:32 לב וששה קנים יצאים מצדיה  שלשה קני מנרה מצדה האחד ושלשה קני מנרה מצדה השני
Exo 25:33 לג שלשה גבעים משקדים בקנה האחד כפתר ופרח ושלשה גבעים משקדים בקנה האחד כפתר ופרח כן לששת הקנים היצאים מן המנרה
Exo 25:34 לד ובמנרה ארבעה גבעים  משקדים--כפתריה ופרחיה
Exo 25:35 לה וכפתר תחת שני הקנים ממנה וכפתר תחת שני הקנים ממנה וכפתר תחת שני הקנים ממנה--לששת הקנים היצאים מן המנרה
Exo 25:36 לו כפתריהם וקנתם ממנה יהיו כלה מקשה אחת זהב טהור
Exo 25:37 לז ועשית את נרתיה שבעה והעלה את נרתיה והאיר על עבר פניה
Exo 25:38 לח ומלקחיה ומחתתיה זהב טהור
Exo 25:39 לט ככר זהב טהור יעשה אתה--את כל הכלים האלה
Exo 25:40 מ וראה ועשה  בתבניתם--אשר אתה מראה בהר  {ס}