Exo 22:1 א אם במחתרת ימצא הגנב והכה ומת--אין לו דמים
Exo 22:2 ב אם זרחה השמש עליו דמים לו  שלם ישלם--אם אין לו ונמכר בגנבתו
Exo 22:3 ג אם המצא תמצא בידו הגנבה משור עד חמור עד שה--חיים  שנים ישלם  {ס}
Exo 22:4 ד כי יבער איש שדה או כרם ושלח את בעירה ובער בשדה אחר--מיטב שדהו ומיטב כרמו ישלם  {ס}
Exo 22:5 ה כי תצא אש ומצאה קצים ונאכל גדיש או הקמה או השדה--שלם ישלם המבער את הבערה  {ס}
Exo 22:6 ו כי יתן איש אל רעהו כסף או כלים לשמר וגנב מבית האיש--אם ימצא הגנב ישלם שנים
Exo 22:7 ז אם לא ימצא הגנב ונקרב בעל הבית אל האלהים  אם לא שלח ידו במלאכת רעהו
Exo 22:8 ח על כל דבר פשע על שור על חמור על שה על שלמה על כל אבדה אשר יאמר כי הוא זה--עד האלהים יבא דבר שניהם  אשר ירשיען אלהים ישלם שנים לרעהו  {ס}
Exo 22:9 ט כי יתן איש אל רעהו חמור או שור או שה וכל בהמה--לשמר ומת או נשבר או נשבה אין ראה
Exo 22:10 י שבעת יהוה תהיה בין שניהם--אם לא שלח ידו במלאכת רעהו ולקח בעליו ולא ישלם
Exo 22:11 יא ואם גנב יגנב מעמו--ישלם לבעליו
Exo 22:12 יב אם טרף יטרף יבאהו עד  הטרפה לא ישלם  {פ}
Exo 22:13 יג וכי ישאל איש מעם רעהו ונשבר או מת בעליו אין עמו שלם ישלם
Exo 22:14 יד אם בעליו עמו לא ישלם  אם שכיר הוא בא בשכרו  {ס}
Exo 22:15 טו וכי יפתה איש בתולה אשר לא ארשה--ושכב עמה  מהר ימהרנה לו לאשה
Exo 22:16 טז אם מאן ימאן אביה לתתה לו--כסף ישקל כמהר הבתולת  {ס}
Exo 22:17 יז מכשפה לא תחיה
Exo 22:18 יח כל שכב עם בהמה מות יומת  {ס}
Exo 22:19 יט זבח לאלהים יחרם--בלתי ליהוה לבדו
Exo 22:20 כ וגר לא תונה ולא תלחצנו  כי גרים הייתם בארץ מצרים
Exo 22:21 כא כל אלמנה ויתום לא תענון
Exo 22:22 כב אם ענה תענה אתו--כי אם צעק יצעק אלי שמע אשמע צעקתו
Exo 22:23 כג וחרה אפי והרגתי אתכם בחרב והיו נשיכם אלמנות ובניכם יתמים  {פ}
Exo 22:24 כד אם כסף תלוה את עמי את העני עמך--לא תהיה לו כנשה לא תשימון עליו נשך
Exo 22:25 כה אם חבל תחבל שלמת רעך--עד בא השמש תשיבנו לו
Exo 22:26 כו כי הוא כסותה לבדה הוא שמלתו לערו במה ישכב--והיה כי יצעק אלי ושמעתי כי חנון אני  {ס}
Exo 22:27 כז אלהים לא תקלל ונשיא בעמך לא תאר
Exo 22:28 כח מלאתך ודמעך לא תאחר בכור בניך תתן לי
Exo 22:29 כט כן תעשה לשרך לצאנך  שבעת ימים יהיה עם אמו ביום השמיני תתנו לי
Exo 22:30 ל ואנשי קדש תהיון לי ובשר בשדה טרפה לא תאכלו לכלב תשלכון אתו  {ס}
Exo 22:31