Exo 2:1 א וילך איש מבית לוי ויקח את בת לוי
Exo 2:2 ב ותהר האשה ותלד בן ותרא אתו כי טוב הוא ותצפנהו שלשה ירחים
Exo 2:3 ג ולא יכלה עוד הצפינו ותקח לו תבת גמא ותחמרה בחמר ובזפת ותשם בה את הילד ותשם בסוף על שפת היאר
Exo 2:4 ד ותתצב אחתו מרחק לדעה מה יעשה לו
Exo 2:5 ה ותרד בת פרעה לרחץ על היאר ונערתיה הלכת על יד היאר ותרא את התבה בתוך הסוף ותשלח את אמתה ותקחה
Exo 2:6 ו ותפתח ותראהו את הילד והנה נער בכה ותחמל עליו--ותאמר מילדי העברים זה
Exo 2:7 ז ותאמר אחתו אל בת פרעה האלך וקראתי לך אשה מינקת מן העברית ותינק לך את הילד
Exo 2:8 ח ותאמר לה בת פרעה לכי ותלך העלמה ותקרא את אם הילד
Exo 2:9 ט ותאמר לה בת פרעה היליכי את הילד הזה והינקהו לי ואני אתן את שכרך ותקח האשה הילד ותניקהו
Exo 2:10 י ויגדל הילד ותבאהו לבת פרעה ויהי לה לבן ותקרא שמו משה ותאמר כי מן המים משיתהו
Exo 2:11 יא ויהי בימים ההם ויגדל משה ויצא אל אחיו וירא בסבלתם וירא איש מצרי מכה איש עברי מאחיו
Exo 2:12 יב ויפן כה וכה וירא כי אין איש ויך את המצרי ויטמנהו בחול
Exo 2:13 יג ויצא ביום השני והנה שני אנשים עברים נצים ויאמר לרשע למה תכה רעך
Exo 2:14 יד ויאמר מי שמך לאיש שר ושפט עלינו--הלהרגני אתה אמר כאשר הרגת את המצרי ויירא משה ויאמר אכן נודע הדבר
Exo 2:15 טו וישמע פרעה את הדבר הזה ויבקש להרג את משה ויברח משה מפני פרעה וישב בארץ מדין וישב על הבאר
Exo 2:16 טז ולכהן מדין שבע בנות ותבאנה ותדלנה ותמלאנה את הרהטים להשקות צאן אביהן
Exo 2:17 יז ויבאו הרעים ויגרשום ויקם משה ויושען וישק את צאנם
Exo 2:18 יח ותבאנה אל רעואל אביהן ויאמר מדוע מהרתן בא היום
Exo 2:19 יט ותאמרן--איש מצרי הצילנו מיד הרעים וגם דלה דלה לנו וישק את הצאן
Exo 2:20 כ ויאמר אל בנתיו ואיו למה זה עזבתן את האיש קראן לו ויאכל לחם
Exo 2:21 כא ויואל משה לשבת את האיש ויתן את צפרה בתו למשה
Exo 2:22 כב ותלד בן ויקרא את שמו גרשם  כי אמר--גר הייתי בארץ נכריה  {פ}
Exo 2:23 כג ויהי בימים הרבים ההם וימת מלך מצרים ויאנחו בני ישראל מן העבדה ויזעקו ותעל שועתם אל האלהים מן העבדה
Exo 2:24 כד וישמע אלהים את נאקתם ויזכר אלהים את בריתו את אברהם את יצחק ואת יעקב
Exo 2:25 כה וירא אלהים את בני ישראל וידע אלהים  {ס}