Exo 23:1 א לא תשא שמע שוא אל תשת ידך עם רשע להית עד חמס
Exo 23:2 ב לא תהיה אחרי רבים לרעת ולא תענה על רב לנטת אחרי רבים--להטת
Exo 23:3 ג ודל לא תהדר בריבו  {ס}
Exo 23:4 ד כי תפגע שור איבך או חמרו--תעה  השב תשיבנו לו  {ס}
Exo 23:5 ה כי תראה חמור שנאך רבץ תחת משאו וחדלת מעזב לו--עזב תעזב עמו  {ס}
Exo 23:6 ו לא תטה משפט אבינך בריבו
Exo 23:7 ז מדבר שקר תרחק ונקי וצדיק אל תהרג כי לא אצדיק רשע
Exo 23:8 ח ושחד לא תקח  כי השחד יעור פקחים ויסלף דברי צדיקים
Exo 23:9 ט וגר לא תלחץ ואתם ידעתם את נפש הגר--כי גרים הייתם בארץ מצרים
Exo 23:10 י ושש שנים תזרע את ארצך ואספת את תבואתה
Exo 23:11 יא והשביעת תשמטנה ונטשתה ואכלו אביני עמך ויתרם תאכל חית השדה כן תעשה לכרמך לזיתך
Exo 23:12 יב ששת ימים תעשה מעשיך וביום השביעי תשבת--למען ינוח שורך וחמרך וינפש בן אמתך והגר
Exo 23:13 יג ובכל אשר אמרתי אליכם תשמרו ושם אלהים אחרים לא תזכירו לא ישמע על פיך
Exo 23:14 יד שלש רגלים תחג לי בשנה
Exo 23:15 טו את חג המצות תשמר--שבעת ימים תאכל מצות כאשר צויתך למועד חדש האביב כי בו יצאת ממצרים ולא יראו פני ריקם
Exo 23:16 טז וחג הקציר בכורי מעשיך אשר תזרע בשדה וחג האסף בצאת השנה באספך את מעשיך מן השדה
Exo 23:17 יז שלש פעמים בשנה--יראה כל זכורך אל פני האדן יהוה
Exo 23:18 יח לא תזבח על חמץ דם זבחי ולא ילין חלב חגי עד בקר
Exo 23:19 יט ראשית בכורי אדמתך תביא בית יהוה אלהיך לא תבשל גדי בחלב אמו  {פ}
Exo 23:20 כ הנה אנכי שלח מלאך לפניך לשמרך בדרך ולהביאך אל המקום אשר הכנתי
Exo 23:21 כא השמר מפניו ושמע בקלו אל תמר בו  כי לא ישא לפשעכם כי שמי בקרבו
Exo 23:22 כב כי אם שמוע תשמע בקלו ועשית כל אשר אדבר--ואיבתי את איביך וצרתי את צרריך
Exo 23:23 כג כי ילך מלאכי לפניך והביאך אל האמרי והחתי והפרזי והכנעני החוי והיבוסי והכחדתיו
Exo 23:24 כד לא תשתחוה לאלהיהם ולא תעבדם ולא תעשה כמעשיהם  כי הרס תהרסם ושבר תשבר מצבתיהם
Exo 23:25 כה ועבדתם את יהוה אלהיכם וברך את לחמך ואת מימיך והסרתי מחלה מקרבך  {ס}
Exo 23:26 כו לא תהיה משכלה ועקרה בארצך את מספר ימיך אמלא
Exo 23:27 כז את אימתי אשלח לפניך והמתי את כל העם אשר תבא בהם ונתתי את כל איביך אליך ערף
Exo 23:28 כח ושלחתי את הצרעה לפניך וגרשה את החוי את הכנעני ואת החתי--מלפניך
Exo 23:29 כט לא אגרשנו מפניך בשנה אחת  פן תהיה הארץ שממה ורבה עליך חית השדה
Exo 23:30 ל מעט מעט אגרשנו מפניך עד אשר תפרה ונחלת את הארץ
Exo 23:31 לא ושתי את גבלך מים סוף ועד ים פלשתים וממדבר עד הנהר  כי אתן בידכם את ישבי הארץ וגרשתמו מפניך
Exo 23:32 לב לא תכרת להם ולאלהיהם ברית
Exo 23:33 לג לא ישבו בארצך פן יחטיאו אתך לי  כי תעבד את אלהיהם כי יהיה לך למוקש  {פ}