Hab 1:1 א המשא אשר חזה חבקוק הנביא
Hab 1:2 ב עד אנה יהוה שועתי ולא תשמע  אזעק אליך חמס ולא תושיע
Hab 1:3 ג למה תראני און ועמל תביט ושד וחמס לנגדי ויהי ריב ומדון ישא
Hab 1:4 ד על כן תפוג תורה ולא יצא לנצח משפט  כי רשע מכתיר את הצדיק על כן יצא משפט מעקל
Hab 1:5 ה ראו בגוים והביטו והתמהו תמהו  כי פעל פעל בימיכם לא תאמינו כי יספר
Hab 1:6 ו כי הנני מקים את הכשדים הגוי המר והנמהר ההולך למרחבי ארץ לרשת משכנות לא לו
Hab 1:7 ז אים ונורא הוא ממנו משפטו ושאתו יצא
Hab 1:8 ח וקלו מנמרים סוסיו וחדו מזאבי ערב ופשו פרשיו ופרשיו מרחוק יבאו--יעפו כנשר חש לאכול
Hab 1:9 ט כלה לחמס יבוא מגמת פניהם קדימה ויאסף כחול שבי
Hab 1:10 י והוא במלכים יתקלס ורזנים משחק לו הוא לכל מבצר ישחק ויצבר עפר וילכדה
Hab 1:11 יא אז חלף רוח ויעבר ואשם  זו כחו לאלהו
Hab 1:12 יב הלוא אתה מקדם יהוה אלהי קדשי--לא נמות יהוה למשפט שמתו וצור להוכיח יסדתו
Hab 1:13 יג טהור עינים מראות רע והביט אל עמל לא תוכל  למה תביט בוגדים--תחריש בבלע רשע צדיק ממנו
Hab 1:14 יד ותעשה אדם כדגי הים--כרמש לא משל בו
Hab 1:15 טו כלה בחכה העלה--יגרהו בחרמו ויאספהו במכמרתו על כן ישמח ויגיל
Hab 1:16 טז על כן יזבח לחרמו ויקטר למכמרתו  כי בהמה שמן חלקו ומאכלו בראה
Hab 1:17 יז העל כן יריק חרמו ותמיד להרג גוים לא יחמול  {ס}