Exo 16:1 א ויסעו מאילם ויבאו כל עדת בני ישראל אל מדבר סין אשר בין אילם ובין סיני--בחמשה עשר יום לחדש השני לצאתם מארץ מצרים
Exo 16:2 ב וילינו (וילונו) כל עדת בני ישראל על משה ועל אהרן--במדבר
Exo 16:3 ג ויאמרו אלהם בני ישראל מי יתן מותנו ביד יהוה בארץ מצרים בשבתנו על סיר הבשר באכלנו לחם לשבע  כי הוצאתם אתנו אל המדבר הזה להמית את כל הקהל הזה ברעב  {ס}
Exo 16:4 ד ויאמר יהוה אל משה הנני ממטיר לכם לחם מן השמים ויצא העם ולקטו דבר יום ביומו למען אנסנו הילך בתורתי אם לא
Exo 16:5 ה והיה ביום הששי והכינו את אשר יביאו והיה משנה על אשר ילקטו יום יום
Exo 16:6 ו ויאמר משה ואהרן אל כל בני ישראל  ערב--וידעתם כי יהוה הוציא אתכם מארץ מצרים
Exo 16:7 ז ובקר וראיתם את כבוד יהוה בשמעו את תלנתיכם על יהוה ונחנו מה כי תלונו (תלינו) עלינו
Exo 16:8 ח ויאמר משה בתת יהוה לכם בערב בשר לאכל ולחם בבקר לשבע בשמע יהוה את תלנתיכם אשר אתם מלינם עליו ונחנו מה לא עלינו תלנתיכם כי על יהוה
Exo 16:9 ט ויאמר משה אל אהרן אמר אל כל עדת בני ישראל קרבו לפני יהוה  כי שמע את תלנתיכם
Exo 16:10 י ויהי כדבר אהרן אל כל עדת בני ישראל ויפנו אל המדבר והנה כבוד יהוה נראה בענן  {פ}
Exo 16:11 יא וידבר יהוה אל משה לאמר
Exo 16:12 יב שמעתי את תלונת בני ישראל--דבר אלהם לאמר בין הערבים תאכלו בשר ובבקר תשבעו לחם וידעתם כי אני יהוה אלהיכם
Exo 16:13 יג ויהי בערב--ותעל השלו ותכס את המחנה ובבקר היתה שכבת הטל סביב למחנה
Exo 16:14 יד ותעל שכבת הטל והנה על פני המדבר דק מחספס--דק ככפר על הארץ
Exo 16:15 טו ויראו בני ישראל ויאמרו איש אל אחיו מן הוא--כי לא ידעו מה הוא ויאמר משה אלהם הוא הלחם אשר נתן יהוה לכם לאכלה
Exo 16:16 טז זה הדבר אשר צוה יהוה לקטו ממנו איש לפי אכלו  עמר לגלגלת מספר נפשתיכם--איש לאשר באהלו תקחו
Exo 16:17 יז ויעשו כן בני ישראל וילקטו המרבה והממעיט
Exo 16:18 יח וימדו בעמר--ולא העדיף המרבה והממעיט לא החסיר  איש לפי אכלו לקטו
Exo 16:19 יט ויאמר משה אלהם  איש אל יותר ממנו עד בקר
Exo 16:20 כ ולא שמעו אל משה ויותרו אנשים ממנו עד בקר וירם תולעים ויבאש ויקצף עלהם משה
Exo 16:21 כא וילקטו אתו בבקר בבקר איש כפי אכלו וחם השמש ונמס
Exo 16:22 כב ויהי ביום הששי לקטו לחם משנה--שני העמר לאחד ויבאו כל נשיאי העדה ויגידו למשה
Exo 16:23 כג ויאמר אלהם הוא אשר דבר יהוה--שבתון שבת קדש ליהוה מחר  את אשר תאפו אפו ואת אשר תבשלו בשלו ואת כל העדף הניחו לכם למשמרת עד הבקר
Exo 16:24 כד ויניחו אתו עד הבקר כאשר צוה משה ולא הבאיש ורמה לא היתה בו
Exo 16:25 כה ויאמר משה אכלהו היום כי שבת היום ליהוה  היום לא תמצאהו בשדה
Exo 16:26 כו ששת ימים תלקטהו וביום השביעי שבת לא יהיה בו
Exo 16:27 כז ויהי ביום השביעי יצאו מן העם ללקט ולא מצאו  {ס}
Exo 16:28 כח ויאמר יהוה אל משה  עד אנה מאנתם לשמר מצותי ותורתי
Exo 16:29 כט ראו כי יהוה נתן לכם השבת--על כן הוא נתן לכם ביום הששי לחם יומים שבו איש תחתיו אל יצא איש ממקמו--ביום השביעי
Exo 16:30 ל וישבתו העם ביום השבעי
Exo 16:31 לא ויקראו בית ישראל את שמו מן והוא כזרע גד לבן וטעמו כצפיחת בדבש
Exo 16:32 לב ויאמר משה זה הדבר אשר צוה יהוה--מלא העמר ממנו למשמרת לדרתיכם  למען יראו את הלחם אשר האכלתי אתכם במדבר בהוציאי אתכם מארץ מצרים
Exo 16:33 לג ויאמר משה אל אהרן קח צנצנת אחת ותן שמה מלא העמר מן והנח אתו לפני יהוה למשמרת לדרתיכם
Exo 16:34 לד כאשר צוה יהוה אל משה ויניחהו אהרן לפני העדת למשמרת
Exo 16:35 לה ובני ישראל אכלו את המן ארבעים שנה--עד באם אל ארץ נושבת  את המן אכלו--עד באם אל קצה ארץ כנען
Exo 16:36 לו והעמר עשרית האיפה הוא  {פ}