Gen 44:1 א ויצו את אשר על ביתו לאמר מלא את אמתחת האנשים אכל כאשר יוכלון שאת ושים כסף איש בפי אמתחתו
Gen 44:2 ב ואת גביעי גביע הכסף תשים בפי אמתחת הקטן ואת כסף שברו ויעש כדבר יוסף אשר דבר
Gen 44:3 ג הבקר אור והאנשים שלחו המה וחמריהם
Gen 44:4 ד הם יצאו את העיר לא הרחיקו ויוסף אמר לאשר על ביתו קום רדף אחרי האנשים והשגתם ואמרת אלהם למה שלמתם רעה תחת טובה
Gen 44:5 ה הלוא זה אשר ישתה אדני בו והוא נחש ינחש בו הרעתם אשר עשיתם
Gen 44:6 ו וישגם וידבר אלהם את הדברים האלה
Gen 44:7 ז ויאמרו אליו--למה ידבר אדני כדברים האלה חלילה לעבדיך מעשות כדבר הזה
Gen 44:8 ח הן כסף אשר מצאנו בפי אמתחתינו--השיבנו אליך מארץ כנען ואיך נגנב מבית אדניך כסף או זהב
Gen 44:9 ט אשר ימצא אתו מעבדיך ומת וגם אנחנו נהיה לאדני לעבדים
Gen 44:10 י ויאמר גם עתה כדבריכם כן הוא  אשר ימצא אתו יהיה לי עבד ואתם תהיו נקים
Gen 44:11 יא וימהרו ויורדו איש את אמתחתו--ארצה ויפתחו איש אמתחתו
Gen 44:12 יב ויחפש--בגדול החל ובקטן כלה וימצא הגביע באמתחת בנימן
Gen 44:13 יג ויקרעו שמלתם ויעמס איש על חמרו וישבו העירה
Gen 44:14 יד ויבא יהודה ואחיו ביתה יוסף והוא עודנו שם ויפלו לפניו ארצה
Gen 44:15 טו ויאמר להם יוסף מה המעשה הזה אשר עשיתם הלוא ידעתם כי נחש ינחש איש אשר כמני
Gen 44:16 טז ויאמר יהודה מה נאמר לאדני מה נדבר ומה נצטדק האלהים מצא את עון עבדיך--הננו עבדים לאדני גם אנחנו גם אשר נמצא הגביע בידו
Gen 44:17 יז ויאמר--חלילה לי מעשות זאת האיש אשר נמצא הגביע בידו הוא יהיה לי עבד ואתם עלו לשלום אל אביכם  {ס}
Gen 44:18 יח ויגש אליו יהודה ויאמר בי אדני ידבר נא עבדך דבר באזני אדני ואל יחר אפך בעבדך  כי כמוך כפרעה
Gen 44:19 יט אדני שאל את עבדיו לאמר  היש לכם אב או אח
Gen 44:20 כ ונאמר אל אדני יש לנו אב זקן וילד זקנים קטן ואחיו מת ויותר הוא לבדו לאמו ואביו אהבו
Gen 44:21 כא ותאמר אל עבדיך הורדהו אלי ואשימה עיני עליו
Gen 44:22 כב ונאמר אל אדני לא יוכל הנער לעזב את אביו  ועזב את אביו ומת
Gen 44:23 כג ותאמר אל עבדיך אם לא ירד אחיכם הקטן אתכם--לא תספון לראות פני
Gen 44:24 כד ויהי כי עלינו אל עבדך אבי ונגד לו--את דברי אדני
Gen 44:25 כה ויאמר אבינו  שבו שברו לנו מעט אכל
Gen 44:26 כו ונאמר לא נוכל לרדת  אם יש אחינו הקטן אתנו וירדנו--כי לא נוכל לראות פני האיש ואחינו הקטן איננו אתנו
Gen 44:27 כז ויאמר עבדך אבי אלינו  אתם ידעתם כי שנים ילדה לי אשתי
Gen 44:28 כח ויצא האחד מאתי ואמר אך טרף טרף ולא ראיתיו עד הנה
Gen 44:29 כט ולקחתם גם את זה מעם פני וקרהו אסון--והורדתם את שיבתי ברעה שאלה
Gen 44:30 ל ועתה כבאי אל עבדך אבי והנער איננו אתנו ונפשו קשורה בנפשו
Gen 44:31 לא והיה כראותו כי אין הנער--ומת והורידו עבדיך את שיבת עבדך אבינו ביגון--שאלה
Gen 44:32 לב כי עבדך ערב את הנער מעם אבי לאמר  אם לא אביאנו אליך וחטאתי לאבי כל הימים
Gen 44:33 לג ועתה ישב נא עבדך תחת הנער--עבד לאדני והנער יעל עם אחיו
Gen 44:34 לד כי איך אעלה אל אבי והנער איננו אתי  פן אראה ברע אשר ימצא את אבי