Mic 6:1 א שמעו נא את אשר יהוה אמר  קום ריב את ההרים ותשמענה הגבעות קולך
Mic 6:2 ב שמעו הרים את ריב יהוה והאתנים מוסדי ארץ  כי ריב ליהוה עם עמו ועם ישראל יתוכח
Mic 6:3 ג עמי מה עשיתי לך ומה הלאתיך  ענה בי
Mic 6:4 ד כי העלתיך מארץ מצרים ומבית עבדים פדיתיך ואשלח לפניך את משה אהרן ומרים
Mic 6:5 ה עמי זכר נא מה יעץ בלק מלך מואב ומה ענה אתו בלעם בן בעור--מן השטים עד הגלגל למען דעת צדקות יהוה
Mic 6:6 ו במה אקדם יהוה אכף לאלהי מרום האקדמנו בעולות בעגלים בני שנה
Mic 6:7 ז הירצה יהוה באלפי אילים ברבבות נחלי שמן האתן בכורי פשעי פרי בטני חטאת נפשי
Mic 6:8 ח הגיד לך אדם מה טוב ומה יהוה דורש ממך כי אם עשות משפט ואהבת חסד והצנע לכת עם אלהיך  {ס}
Mic 6:9 ט קול יהוה לעיר יקרא ותושיה יראה שמך שמעו מטה ומי יעדה
Mic 6:10 י עוד האש בית רשע--אצרות רשע ואיפת רזון זעומה
Mic 6:11 יא האזכה במאזני רשע ובכיס אבני מרמה
Mic 6:12 יב אשר עשיריה מלאו חמס וישביה דברו שקר ולשונם רמיה בפיהם
Mic 6:13 יג וגם אני החליתי הכותך--השמם על חטאתך
Mic 6:14 יד אתה תאכל ולא תשבע וישחך בקרבך ותסג ולא תפליט ואשר תפלט לחרב אתן
Mic 6:15 טו אתה תזרע ולא תקצור אתה תדרך זית ולא תסוך שמן ותירוש ולא תשתה יין
Mic 6:16 טז וישתמר חקות עמרי וכל מעשה בית אחאב ותלכו במעצותם--למען תתי אתך לשמה וישביה לשרקה וחרפת עמי תשאו  {פ}