Mic 5:1 א ואתה בית לחם אפרתה צעיר להיות באלפי יהודה--ממך לי יצא להיות מושל בישראל ומוצאתיו מקדם מימי עולם
Mic 5:2 ב לכן יתנם עד עת יולדה ילדה ויתר אחיו ישובון על בני ישראל
Mic 5:3 ג ועמד ורעה בעז יהוה--בגאון שם יהוה אלהיו וישבו כי עתה יגדל עד אפסי ארץ
Mic 5:4 ד והיה זה שלום אשור כי יבוא בארצנו וכי ידרך בארמנותינו והקמנו עליו שבעה רעים ושמנה נסיכי אדם
Mic 5:5 ה ורעו את ארץ אשור בחרב ואת ארץ נמרד בפתחיה והציל מאשור--כי יבוא בארצנו וכי ידרך בגבולנו  {פ}
Mic 5:6 ו והיה שארית יעקב בקרב עמים רבים כטל מאת יהוה כרביבים עלי עשב--אשר לא יקוה לאיש ולא ייחל לבני אדם  {פ}
Mic 5:7 ז והיה שארית יעקב בגוים בקרב עמים רבים כאריה בבהמות יער ככפיר בעדרי צאן--אשר אם עבר ורמס וטרף ואין מציל
Mic 5:8 ח תרם ידך על צריך וכל איביך יכרתו
Mic 5:9 ט והיה ביום ההוא נאם יהוה והכרתי סוסיך מקרבך והאבדתי מרכבתיך
Mic 5:10 י והכרתי ערי ארצך והרסתי כל מבצריך
Mic 5:11 יא והכרתי כשפים מידך ומעוננים לא יהיו לך
Mic 5:12 יב והכרתי פסיליך ומצבותיך מקרבך ולא תשתחוה עוד למעשה ידיך
Mic 5:13 יג ונתשתי אשיריך מקרבך והשמדתי עריך
Mic 5:14 יד ועשיתי באף ובחמה נקם--את הגוים  אשר לא שמעו  {פ}
Mic 5:15