Amos 2:1 א כה אמר יהוה על שלשה פשעי מואב ועל ארבעה לא אשיבנו  על שרפו עצמות מלך אדום לשיד
Amos 2:2 ב ושלחתי אש במואב ואכלה ארמנות הקריות ומת בשאון מואב בתרועה בקול שופר
Amos 2:3 ג והכרתי שופט מקרבה וכל שריה אהרוג עמו אמר יהוה  {פ}
Amos 2:4 ד כה אמר יהוה על שלשה פשעי יהודה ועל ארבעה לא אשיבנו  על מאסם את תורת יהוה וחקיו לא שמרו ויתעום כזביהם אשר הלכו אבותם אחריהם
Amos 2:5 ה ושלחתי אש ביהודה ואכלה ארמנות ירושלם  {פ}
Amos 2:6 ו כה אמר יהוה על שלשה פשעי ישראל ועל ארבעה לא אשיבנו  על מכרם בכסף צדיק ואביון בעבור נעלים
Amos 2:7 ז השאפים על עפר ארץ בראש דלים ודרך ענוים יטו ואיש ואביו ילכו אל הנערה למען חלל את שם קדשי
Amos 2:8 ח ועל בגדים חבלים יטו אצל כל מזבח ויין ענושים ישתו בית אלהיהם
Amos 2:9 ט ואנכי השמדתי את האמרי מפניהם אשר כגבה ארזים גבהו וחסן הוא כאלונים ואשמיד פריו ממעל ושרשיו מתחת
Amos 2:10 י ואנכי העליתי אתכם מארץ מצרים ואולך אתכם במדבר ארבעים שנה לרשת את ארץ האמרי
Amos 2:11 יא ואקים מבניכם לנביאים ומבחוריכם לנזרים האף אין זאת בני ישראל נאם יהוה
Amos 2:12 יב ותשקו את הנזרים יין ועל הנביאים צויתם לאמר לא תנבאו
Amos 2:13 יג הנה אנכי מעיק תחתיכם כאשר תעיק העגלה המלאה לה עמיר
Amos 2:14 יד ואבד מנוס מקל וחזק לא יאמץ כחו וגבור לא ימלט נפשו
Amos 2:15 טו ותפש הקשת לא יעמד וקל ברגליו לא ימלט ורכב הסוס לא ימלט נפשו
Amos 2:16 טז ואמיץ לבו בגבורים--ערום ינוס ביום ההוא נאם יהוה  {פ}