Hos 4:1 א שמעו דבר יהוה בני ישראל  כי ריב ליהוה עם יושבי הארץ--כי אין אמת ואין חסד ואין דעת אלהים בארץ
Hos 4:2 ב אלה וכחש ורצח וגנב ונאף פרצו ודמים בדמים נגעו
Hos 4:3 ג על כן תאבל הארץ ואמלל כל יושב בה בחית השדה ובעוף השמים וגם דגי הים יאספו
Hos 4:4 ד אך איש אל ירב ואל יוכח איש ועמך כמריבי כהן
Hos 4:5 ה וכשלת היום וכשל גם נביא עמך לילה ודמיתי אמך
Hos 4:6 ו נדמו עמי מבלי הדעת  כי אתה הדעת מאסת ואמאסאך (ואמאסך) מכהן לי ותשכח תורת אלהיך אשכח בניך גם אני
Hos 4:7 ז כרבם כן חטאו לי כבודם בקלון אמיר
Hos 4:8 ח חטאת עמי יאכלו ואל עונם ישאו נפשו
Hos 4:9 ט והיה כעם ככהן ופקדתי עליו דרכיו ומעלליו אשיב לו
Hos 4:10 י ואכלו ולא ישבעו הזנו ולא יפרצו  כי את יהוה עזבו לשמר
Hos 4:11 יא זנות ויין ותירוש יקח לב
Hos 4:12 יב עמי בעצו ישאל ומקלו יגיד לו  כי רוח זנונים התעה ויזנו מתחת אלהיהם
Hos 4:13 יג על ראשי ההרים יזבחו ועל הגבעות יקטרו תחת אלון ולבנה ואלה כי טוב צלה על כן תזנינה בנותיכם וכלותיכם תנאפנה
Hos 4:14 יד לא אפקוד על בנותיכם כי תזנינה ועל כלותיכם כי תנאפנה--כי הם עם הזנות יפרדו ועם הקדשות יזבחו ועם לא יבין ילבט
Hos 4:15 טו אם זנה אתה ישראל אל יאשם יהודה ואל תבאו הגלגל ואל תעלו בית און ואל תשבעו חי יהוה
Hos 4:16 טז כי כפרה סררה סרר ישראל עתה ירעם יהוה ככבש במרחב
Hos 4:17 יז חבור עצבים אפרים הנח לו
Hos 4:18 יח סר סבאם הזנה הזנו אהבו הבו קלון מגניה
Hos 4:19 יט צרר רוח אותה בכנפיה ויבשו מזבחותם  {פ}